Sukta 40

40.1

9 gathino vishvamitrah, indrah, gayatri

इन्द्र॑ त्वा वृष॒भं व॒यं सु॒ते सोमे॑ हवामहे । स पा॑हि॒ मध्वो॒ अन्ध॑सः ॥१॥

Indra tva vrishabham vayam sute some havamahe, sa pahi madhvo andhasah

इन्द्र॑ क्रतु॒विदं॑ सु॒तं सोमं॑ हर्य पुरुष्टुत । पिबा वृ॑षस्व॒ तातृ॑पिम् ॥२॥

Indra kratuvidam sutam somam harya purushtuta, piba vrishasva tatripim

इन्द्र॒ प्र णो॑ धि॒तावा॑नं य॒ज्ञं विश्वे॑भिर्दे॒वेभि॑ः । ति॒र स्त॑वान विश्पते ॥३॥

Indra pra no dhitavanam yagyam vishvebhirdevebhih, tira stavana vishpate

इन्द्र॒ सोमा॑ः सु॒ता इ॒मे तव॒ प्र य॑न्ति सत्पते । क्षयं॑ च॒न्द्रास॒ इन्द॑वः ॥४॥

Indra somah suta ime tava pra yanti satpate, kshayam chandrasa indavah

द॒धि॒ष्वा ज॒ठरे॑ सु॒तं सोम॑मिन्द्र॒ वरे॑ण्यम् । तव॑ द्यु॒क्षास॒ इन्द॑वः ॥५॥

Dadhishva jathare sutam somamindra varenyam, tava dyukshasa indavah

गिर्व॑णः पा॒हि न॑ः सु॒तं मधो॒र्धारा॑भिरज्यसे । इन्द्र॒ त्वादा॑त॒मिद्यश॑ः ॥६॥

Girvanah pahi nah sutam madhordharabhirajyase, indra tvadatamidyashah

अ॒भि द्यु॒म्नानि॑ व॒निन॒ इन्द्रं॑ सचन्ते॒ अक्षि॑ता । पी॒त्वी सोम॑स्य वावृधे ॥७॥

Abhi dyumnani vanina indram sachante akshita, pitvi somasya vavridhe

अ॒र्वा॒वतो॑ न॒ आ ग॑हि परा॒वत॑श्च वृत्रहन् । इ॒मा जु॑षस्व नो॒ गिर॑ः ॥८॥

Arvavato na a gahi paravatashcha vritrahan, ima jushasva no girah

यद॑न्त॒रा प॑रा॒वत॑मर्वा॒वतं॑ च हू॒यसे॑ । इन्द्रे॒ह तत॒ आ ग॑हि ॥९॥

Yadantara paravatamarvavatam cha huyase, indreha tata a gahi