Sukta 41

41.1

9 gathino vishvamitrah, indrah, gayatri

आ तू न॑ इन्द्र म॒द्र्य॑ग्घुवा॒नः सोम॑पीतये । हरि॑भ्यां याह्यद्रिवः ॥१॥

A tu na indra madryagghuvanah somapitaye, haribhyam yahyadrivah

स॒त्तो होता॑ न ऋ॒त्विय॑स्तिस्ति॒रे ब॒र्हिरा॑नु॒षक् । अयु॑ज्रन्प्रा॒तरद्र॑यः ॥२॥

Satto hota na ritviyastistire barhiranushak, ayujranprataradrayah

इ॒मा ब्रह्म॑ ब्रह्मवाहः क्रि॒यन्त॒ आ ब॒र्हिः सी॑द । वी॒हि शू॑र पुरो॒ळाश॑म् ॥३॥

Ima brahma brahmavahah kriyanta a barhih sida, vihi shura purolasham

रा॒र॒न्धि सव॑नेषु ण ए॒षु स्तोमे॑षु वृत्रहन् । उ॒क्थेष्वि॑न्द्र गिर्वणः ॥४॥

Rarandhi savaneshu na eshu stomeshu vritrahan, uktheshvindra girvanah

म॒तय॑ः सोम॒पामु॒रुं रि॒हन्ति॒ शव॑स॒स्पति॑म् । इन्द्रं॑ व॒त्सं न मा॒तर॑ः ॥५॥

Matayah somapamurum rihanti shavasaspatim, indram vatsam na matarah

स म॑न्दस्वा॒ ह्यन्ध॑सो॒ राध॑से त॒न्वा॑ म॒हे । न स्तो॒तारं॑ नि॒दे क॑रः ॥६॥

Sa mandasva hyandhaso radhase tanva mahe, na stotaram nide karah

व॒यमि॑न्द्र त्वा॒यवो॑ ह॒विष्म॑न्तो जरामहे । उ॒त त्वम॑स्म॒युर्व॑सो ॥७॥

Vayamindra tvayavo havishmanto jaramahe, uta tvamasmayurvaso

मारे अ॒स्मद् वि मु॑मुचो॒ हरि॑प्रिया॒र्वाङ् या॑हि । इन्द्र॑ स्वधावो॒ मत्स्वे॒ह ॥८॥

Mare asmad vi mumucho haripriyarvang yahi, indra svadhavo matsveha

अ॒र्वाञ्चं॑ त्वा सु॒खे रथे॒ वह॑तामिन्द्र के॒शिना॑ । घृ॒तस्नू॑ ब॒र्हिरा॒सदे॑ ॥९॥

Arvancham tva sukhe rathe vahatamindra keshina, ghritasnu barhirasade