Sukta 23

23.1

5 devashrava devavatashcha bharatau, agnih, trishtup, 3 satobrihati

निर्म॑थित॒ः सुधि॑त॒ आ स॒धस्थे॒ युवा॑ क॒विर॑ध्व॒रस्य॑ प्रणे॒ता ।
जूर्य॑त्स्व॒ग्निर॒जरो॒ वने॒ष्वत्रा॑ दधे अ॒मृतं॑ जा॒तवे॑दाः ॥१॥

Nirmathitah sudhita a sadhasthe yuva kaviradhvarasya praneta
Juryatsvagnirajaro vaneshvatra dadhe amritam jatavedah

अम॑न्थिष्टां॒ भार॑ता रे॒वद॒ग्निं दे॒वश्र॑वा दे॒ववा॑तः सु॒दक्ष॑म् ।
अग्ने॒ वि प॑श्य बृह॒ताभि रा॒येषां नो॑ ने॒ता भ॑वता॒दनु॒ द्यून् ॥२॥

Amanthishtam bharata revadagnim devashrava devavatah sudaksham
Agne vi pashya brihatabhi rayesham no neta bhavatadanu dyun

दश॒ क्षिप॑ः पू॒र्व्यं सी॑मजीजन॒न् त्सुजा॑तं मा॒तृषु॑ प्रि॒यम् ।
अ॒ग्निं स्तु॑हि दैववा॒तं दे॑वश्रवो॒ यो जना॑ना॒मस॑द् व॒शी ॥३॥

Dasha kshipah purvyam simajijanan tsujatam matrishu priyam
Agnim stuhi daivavatam devashravo yo jananamasad vashi

नि त्वा॑ दधे॒ वर॒ आ पृ॑थि॒व्या इळा॑यास्प॒दे सु॑दिन॒त्वे अह्ना॑म् ।
दृ॒षद्व॑त्यां॒ मानु॑ष आप॒यायां॒ सर॑स्वत्यां रे॒वद॑ग्ने दिदीहि ॥४॥

Ni tva dadhe vara a prithivya ilayaspade sudinatve ahnam
Drishadvatyam manusha apayayam sarasvatyam revadagne didihi

इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑ः सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे ॥५॥

Ilamagne purudansam sanim goh shashvattamam havamanaya sadha
Syannah sunustanayo vijavagne sa te sumatirbhutvasme