Sukta 22

22.1

5 gathi kaushikah, agnih, 4 purishya agnayah, trishtup, 4 anushtup

अ॒यं सो अ॒ग्निर्यस्मि॒न् त्सोम॒मिन्द्र॑ः सु॒तं द॒धे ज॒ठरे॑ वावशा॒नः ।
स॒ह॒स्रिणं॒ वाज॒मत्यं॒ न सप्तिं॑ सस॒वान् त्सन् त्स्तू॑यसे जातवेदः ॥१॥

Ayam so agniryasmin tsomamindrah sutam dadhe jathare vavashanah
Sahasrinam vajamatyam na saptim sasavan tsan tstuyase jatavedah

22.2

अग्ने॒ यत् ते॑ दि॒वि वर्च॑ः पृथि॒व्यां यदोष॑धीष्व॒प्स्वा य॑जत्र ।
येना॒न्तरि॑क्षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चक्षा॑ः ॥२॥

Agne yat te divi varchah prithivyam yadoshadhishvapsva yajatra
Yenantarikshamurvatatantha tveshah sa bhanurarnavo nrichakshah

22.3

अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाँ ऊ॑चिषे॒ धिष्ण्या॒ ये ।
या रो॑च॒ने प॒रस्ता॒त् सूर्य॑स्य॒ याश्चा॒वस्ता॑दुप॒तिष्ठ॑न्त॒ आप॑ः ॥३॥

Agne divo arnamachchha jigasyachchha devam uchishe dhishnya ye
Ya rochane parastat suryasya yashchavastadupatishthanta apah

22.4

पु॒री॒ष्या॑सो अ॒ग्नय॑ः प्राव॒णेभि॑ः स॒जोष॑सः ।
जु॒षन्तां॑ य॒ज्ञम॒द्रुहो॑ऽनमी॒वा इषो॑ म॒हीः ॥४॥

Purishyaso agnayah pravanebhih sajoshasah
Jushantam yagyamadruhonamiva isho mahih

22.5

इळा॑मग्ने पुरु॒दंसं॑ स॒निं गोः श॑श्वत्त॒मं हव॑मानाय साध ।
स्यान्न॑ः सू॒नुस्तन॑यो वि॒जावा ऽग्ने॒ सा ते॑ सुम॒तिर्भू॑त्व॒स्मे ॥५॥

Ilamagne purudansam sanim goh shashvattamam havamanaya sadha
Syannah sunustanayo vijava gne sa te sumatirbhutvasme