Sukta 13

13.1

7 rishabho vaishvamitrah, agnih, anushtup

प्र वो॑ दे॒वाया॒ग्नये॒ बर्हि॑ष्ठमर्चास्मै ।
गम॑द् दे॒वेभि॒रा स नो॒ यजि॑ष्ठो ब॒र्हिरा स॑दत् ॥१॥

Pra vo devayagnaye barhishthamarchasmai
Gamad devebhira sa no yajishtho barhira sadat

13.2

ऋ॒तावा॒ यस्य॒ रोद॑सी॒ दक्षं॒ सच॑न्त ऊ॒तय॑ः ।
ह॒विष्म॑न्त॒स्तमी॑ळते॒ तं स॑नि॒ष्यन्तोऽव॑से ॥२॥

Ritava yasya rodasi daksham sachanta utayah
Havishmantastamilate tam sanishyantovase

13.3

स य॒न्ता विप्र॑ एषां॒ स य॒ज्ञाना॒मथा॒ हि षः ।
अ॒ग्निं तं वो॑ दुवस्यत॒ दाता॒ यो वनि॑ता म॒घम् ॥३॥

Sa yanta vipra esham sa yagyanamatha hi shah
Agnim tam vo duvasyata data yo vanita magham

13.4

स न॒ः शर्मा॑णि वी॒तये॒ऽग्निर्य॑च्छतु॒ शंत॑मा ।
यतो॑ नः प्रु॒ष्णव॒द् वसु॑ दि॒वि क्षि॒तिभ्यो॑ अ॒प्स्वा ॥४॥

Sa nah sharmani vitayegniryachchhatu shantama
Yato nah prushnavad vasu divi kshitibhyo apsva

13.5

दी॒दि॒वांस॒मपू॑र्व्यं॒ वस्वी॑भिरस्य धी॒तिभि॑ः ।
ऋक्वा॑णो अ॒ग्निमि॑न्धते॒ होता॑रं वि॒श्पतिं॑ वि॒शाम् ॥५॥

Didivansamapurvyam vasvibhirasya dhitibhih
Rikvano agnimindhate hotaram vishpatim visham

13.6

उ॒त नो॒ ब्रह्म॑न्नविष उ॒क्थेषु॑ देव॒हूत॑मः ।
शं न॑ः शोचा म॒रुद्वृ॒धोऽग्ने॑ सहस्र॒सात॑मः ॥६॥

Uta no brahmannavisha uktheshu devahutamah
Sham nah shocha marudvridhogne sahasrasatamah

13.7

नू नो॑ रास्व स॒हस्र॑वत् तो॒कव॑त्पुष्टि॒मद् वसु॑ ।
द्यु॒मद॑ग्ने सु॒वीर्यं॒ वर्षि॑ष्ठ॒मनु॑पक्षितम् ॥७॥

Nu no rasva sahasravat tokavatpushtimad vasu
Dyumadagne suviryam varshishthamanupakshitam