Sukta 12

12.1

9 gathino vishvamitrah, indragni, gayatri

इन्द्रा॑ग्नी॒ आ ग॑तं सु॒तं गी॒र्भिर्नभो॒ वरे॑ण्यम् । अ॒स्य पा॑तं धि॒येषि॒ता ॥१॥

Indragni a gatam sutam girbhirnabho varenyam, asya patam dhiyeshita

इन्द्रा॑ग्नी जरि॒तुः सचा॑ य॒ज्ञो जि॑गाति॒ चेत॑नः । अ॒या पा॑तमि॒मं सु॒तम् ॥२॥

Indragni jarituh sacha yagyo jigati chetanah, aya patamimam sutam

इन्द्र॑म॒ग्निं क॑वि॒च्छदा॑ य॒ज्ञस्य॑ जू॒त्या वृ॑णे । ता सोम॑स्ये॒ह तृ॑म्पताम् ॥३॥

Indramagnim kavichchhada yagyasya jutya vrine, ta somasyeha trimpatam

तो॒शा वृ॑त्र॒हणा॑ हुवे स॒जित्वा॒नाप॑राजिता । इ॒न्द्रा॒ग्नी वा॑ज॒सात॑मा ॥४॥

Tosha vritrahana huve sajitvanaparajita, indragni vajasatama

प्र वा॑मर्चन्त्यु॒क्थिनो॑ नीथा॒विदो॑ जरि॒तार॑ः । इन्द्रा॑ग्नी॒ इष॒ आ वृ॑णे ॥५॥

Pra vamarchantyukthino nithavido jaritarah, indragni isha a vrine

इन्द्रा॑ग्नी नव॒तिं पुरो॑ दा॒सप॑त्नीरधूनुतम् । सा॒कमेके॑न॒ कर्म॑णा ॥६॥

Indragni navatim puro dasapatniradhunutam, sakamekena karmana

इन्द्रा॑ग्नी॒ अप॑स॒स्पर्युप॒ प्र य॑न्ति धी॒तय॑ः । ऋ॒तस्य॑ प॒थ्या॒३ अनु॑ ॥७॥

Indragni apasasparyupa pra yanti dhitayah, ritasya pathya3 anu

इन्द्रा॑ग्नी तवि॒षाणि॑ वां स॒धस्था॑नि॒ प्रयां॑सि च । यु॒वोर॒प्तूर्यं॑ हि॒तम् ॥८॥

Indragni tavishani vam sadhasthani prayansi cha, yuvorapturyam hitam

इन्द्रा॑ग्नी रोच॒ना दि॒वः परि॒ वाजे॑षु भूषथः । तद्वां॑ चेति॒ प्र वी॒र्य॑म् ॥९॥

Indragni rochana divah pari vajeshu bhushathah, tadvam cheti pra viryam