Sukta 40

40.1

6 gritsamada (angirasah shaunahotrah pashchad) bhargavah shaunakah, somapushanau, 6(antyardharchasya) aditih, trishtup

सोमा॑पूषणा॒ जन॑ना रयी॒णां जन॑ना दि॒वो जन॑ना पृथि॒व्याः ।
जा॒तौ विश्व॑स्य॒ भुव॑नस्य गो॒पौ दे॒वा अ॑कृण्वन्न॒मृत॑स्य॒ नाभि॑म् ॥१॥

Somapushana janana rayinam janana divo janana prithivyah
Jatau vishvasya bhuvanasya gopau deva akrinvannamritasya nabhim

40.2

इ॒मौ दे॒वौ जाय॑मानौ जुषन्ते॒मौ तमां॑सि गूहता॒मजु॑ष्टा ।
आ॒भ्यामिन्द्र॑ः प॒क्वमा॒मास्व॒न्तः सो॑मापू॒षभ्यां॑ जनदु॒स्रिया॑सु ॥२॥

Imau devau jayamanau jushantemau tamansi guhatamajushta
Abhyamindrah pakvamamasvantah somapushabhyam janadusriyasu

40.3

सोमा॑पूषणा॒ रज॑सो वि॒मानं॑ स॒प्तच॑क्रं॒ रथ॒मवि॑श्वमिन्वम् ।
वि॒षू॒वृतं॒ मन॑सा यु॒ज्यमा॑नं॒ तं जि॑न्वथो वृषणा॒ पञ्च॑रश्मिम् ॥३॥

Somapushana rajaso vimanam saptachakram rathamavishvaminvam
Vishuvritam manasa yujyamanam tam jinvatho vrishana pancharashmim

40.4

दि॒व्य१न्यः सद॑नं च॒क्र उ॒च्चा पृ॑थि॒व्याम॒न्यो अध्य॒न्तरि॑क्षे ।
ताव॒स्मभ्यं॑ पुरु॒वारं॑ पुरु॒क्षुं रा॒यस्पोषं॒ वि ष्य॑तां॒ नाभि॑म॒स्मे ॥४॥

Divya1nyah sadanam chakra uchcha prithivyamanyo adhyantarikshe
Tavasmabhyam puruvaram purukshum rayasposham vi shyatam nabhimasme

40.5

विश्वा॑न्य॒न्यो भुव॑ना ज॒जान॒ विश्व॑म॒न्यो अ॑भि॒चक्षा॑ण एति ।
सोमा॑पूषणा॒वव॑तं॒ धियं॑ मे यु॒वाभ्यां॒ विश्वा॒ः पृत॑ना जयेम ॥५॥

Vishvanyanyo bhuvana jajana vishvamanyo abhichakshana eti
Somapushanavavatam dhiyam me yuvabhyam vishvah pritana jayema

40.6

धियं॑ पू॒षा जि॑न्वतु विश्वमि॒न्वो र॒यिं सोमो॑ रयि॒पति॑र्दधातु ।
अव॑तु दे॒व्यदि॑तिरन॒र्वा बृ॒हद् व॑देम वि॒दथे॑ सु॒वीरा॑ः ॥६॥

Dhiyam pusha jinvatu vishvaminvo rayim somo rayipatirdadhatu
Avatu devyaditiranarva brihad vadema vidathe suvirah