Sukta 39

39.1

8 gritsamada (angirasah shaunahotrah pashchad) bhargavah shaunakah, ashvinau, trishtup

ग्रावा॑णेव॒ तदिदर्थं॑ जरेथे॒ गृध्रे॑व वृ॒क्षं नि॑धि॒मन्त॒मच्छ॑ ।
ब्र॒ह्माणे॑व वि॒दथ॑ उक्थ॒शासा॑ दू॒तेव॒ हव्या॒ जन्या॑ पुरु॒त्रा ॥१॥

Gravaneva tadidartham jarethe gridhreva vriksham nidhimantamachchha
Brahmaneva vidatha ukthashasa duteva havya janya purutra

39.2

प्रा॒त॒र्यावा॑णा र॒थ्ये॑व वी॒रा ऽजेव॑ य॒मा वर॒मा स॑चेथे ।
मेने॑ इव त॒न्वा॒३ शुम्भ॑माने॒ दम्प॑तीव क्रतु॒विदा॒ जने॑षु ॥२॥

Prataryavana rathyeva vira jeva yama varama sachethe
Mene iva tanva3 shumbhamane dampativa kratuvida janeshu

39.3

शृङ्गे॑व नः प्रथ॒मा ग॑न्तम॒र्वाक् छ॒फावि॑व॒ जर्भु॑राणा॒ तरो॑भिः ।
च॒क्र॒वा॒केव॒ प्रति॒ वस्तो॑रुस्रा॒ ऽर्वाञ्चा॑ यातं र॒थ्ये॑व शक्रा ॥३॥

Shringeva nah prathama gantamarvak chhaphaviva jarbhurana tarobhih
Chakravakeva prati vastorusra rvancha yatam rathyeva shakra

39.4

ना॒वेव॑ नः पारयतं यु॒गेव॒ नभ्ये॑व न उप॒धीव॑ प्र॒धीव॑ ।
श्वाने॑व नो॒ अरि॑षण्या त॒नूनां॒ खृग॑लेव वि॒स्रस॑ः पातम॒स्मान् ॥४॥

Naveva nah parayatam yugeva nabhyeva na upadhiva pradhiva
Shvaneva no arishanya tanunam khrigaleva visrasah patamasman

39.5

वाते॑वाजु॒र्या न॒द्ये॑व री॒तिर॒क्षी इ॑व॒ चक्षु॒षा या॑तम॒र्वाक् ।
हस्ता॑विव त॒न्वे॒३ शम्भ॑विष्ठा॒ पादे॑व नो नयतं॒ वस्यो॒ अच्छ॑ ॥५॥

Vatevajurya nadyeva ritirakshi iva chakshusha yatamarvak
Hastaviva tanve3 shambhavishtha padeva no nayatam vasyo achchha

39.6

ओष्ठा॑विव॒ मध्वा॒स्ने वद॑न्ता॒ स्तना॑विव पिप्यतं जी॒वसे॑ नः ।
नासे॑व नस्त॒न्वो॑ रक्षि॒तारा॒ कर्णा॑विव सु॒श्रुता॑ भूतम॒स्मे ॥६॥

Oshthaviva madhvasne vadanta stanaviva pipyatam jivase nah
Naseva nastanvo rakshitara karnaviva sushruta bhutamasme

39.7

हस्ते॑व श॒क्तिम॒भि सं॑द॒दी न॒ः क्षामे॑व न॒ः सम॑जतं॒ रजां॑सि ।
इ॒मा गिरो॑ अश्विना युष्म॒यन्ती॒ः क्ष्णोत्रे॑णेव॒ स्वधि॑तिं॒ सं शि॑शीतम् ॥७॥

Hasteva shaktimabhi sandadi nah kshameva nah samajatam rajansi
Ima giro ashvina yushmayantih kshnotreneva svadhitim sam shishitam

39.8

ए॒तानि॑ वामश्विना॒ वर्ध॑नानि॒ ब्रह्म॒ स्तोमं॑ गृत्सम॒दासो॑ अक्रन् ।
तानि॑ नरा जुजुषा॒णोप॑ यातं बृ॒हद् व॑देम वि॒दथे॑ सु॒वीरा॑ः ॥८॥

Etani vamashvina vardhanani brahma stomam gritsamadaso akran
Tani nara jujushanopa yatam brihad vadema vidathe suvirah