Sukta 25

25.1

5 gritsamada (angirasah shaunahotrah pashchad) bhargavah shaunakah, brahmanaspatih, jagati

इन्धा॑नो अ॒ग्निं व॑नवद् वनुष्य॒तः कृ॒तब्र॑ह्मा शूशुवद् रा॒तह॑व्य॒ इत् ।
जा॒तेन॑ जा॒तमति॒ स प्र स॑र्सृते॒ यंयं॒ युजं॑ कृणु॒ते ब्रह्म॑ण॒स्पति॑ः ॥१॥

Indhano agnim vanavad vanushyatah kritabrahma shushuvad ratahavya it
Jatena jatamati sa pra sarsrite yanyam yujam krinute brahmanaspatih

25.2

वी॒रेभि॑र्वी॒रान् व॑नवद् वनुष्य॒तो गोभी॑ र॒यिं प॑प्रथ॒द् बोध॑ति॒ त्मना॑ ।
तो॒कं च॒ तस्य॒ तन॑यं च वर्धते॒ यंयं॒ युजं॑ कृणु॒ते ब्रह्म॑ण॒स्पति॑ः ॥२॥

Virebhirviran vanavad vanushyato gobhi rayim paprathad bodhati tmana
Tokam cha tasya tanayam cha vardhate yanyam yujam krinute brahmanaspatih

25.3

सिन्धु॒र्न क्षोद॒ः शिमी॑वाँ ऋघाय॒तो वृषे॑व॒ वध्रीँ॑र॒भि व॒ष्ट्योज॑सा ।
अ॒ग्नेरि॑व॒ प्रसि॑ति॒र्नाह॒ वर्त॑वे॒ यंयं॒ युजं॑ कृणु॒ते ब्रह्म॑ण॒स्पति॑ः ॥३॥

Sindhurna kshodah shimivam righayato vrisheva vadhrinrabhi vashtyojasa
Agneriva prasitirnaha vartave yanyam yujam krinute brahmanaspatih

25.4

तस्मा॑ अर्षन्ति दि॒व्या अ॑स॒श्चत॒ः स सत्व॑भिः प्रथ॒मो गोषु॑ गच्छति ।
अनि॑भृष्टतविषिर्ह॒न्त्योज॑सा॒ यंयं॒ युजं॑ कृणु॒ते ब्रह्म॑ण॒स्पति॑ः ॥४॥

Tasma arshanti divya asashchatah sa satvabhih prathamo goshu gachchhati
Anibhrishtatavishirhantyojasa yanyam yujam krinute brahmanaspatih

25.5

तस्मा॒ इद् विश्वे॑ धुनयन्त॒ सिन्ध॒वो ऽच्छि॑द्रा॒ शर्म॑ दधिरे पु॒रूणि॑ ।
दे॒वानां॑ सु॒म्ने सु॒भग॒ः स ए॑धते॒ यंयं॒ युजं॑ कृणु॒ते ब्रह्म॑ण॒स्पति॑ः ॥५॥

Tasma id vishve dhunayanta sindhavo chchhidra sharma dadhire puruni
Devanam sumne subhagah sa edhate yanyam yujam krinute brahmanaspatih