Sukta 24

24.1

16 gritsamada (angirasah shaunahotrah pashchad) bhargavah shaunakah, brahmanaspatih, 1, 10 brihaspatih, 12 indrabrahmanaspati, jagati, 12-16 trishtup

सेमाम॑विड्ढि॒ प्रभृ॑तिं॒ य ईशि॑षे॒ ऽया वि॑धेम॒ नव॑या म॒हा गि॒रा ।
यथा॑ नो मी॒ढ्वान् त्स्तव॑ते॒ सखा॒ तव॒ बृह॑स्पते॒ सीष॑ध॒ः सोत नो॑ म॒तिम् ॥१॥

Semamaviddhi prabhritim ya ishishe ya vidhema navaya maha gira
Yatha no midhvan tstavate sakha tava brihaspate sishadhah sota no matim

24.2

यो नन्त्वा॒न्यन॑म॒न्न्योज॑सो॒ताद॑र्दर्म॒न्युना॒ शम्ब॑राणि॒ वि ।
प्राच्या॑वय॒दच्यु॑ता॒ ब्रह्म॑ण॒स्पति॒रा चावि॑श॒द् वसु॑मन्तं॒ वि पर्व॑तम् ॥२॥

Yo nantvanyanamannyojasotadardarmanyuna shambarani vi
Prachyavayadachyuta brahmanaspatira chavishad vasumantam vi parvatam

24.3

तद् दे॒वानां॑ दे॒वत॑माय॒ कर्त्व॒मश्र॑थ्नन् दृ॒ळहाव्र॑दन्त वीळि॒ता ।
उद्गा आ॑ज॒दभि॑न॒द् ब्रह्म॑णा व॒लमगू॑ह॒त्तमो॒ व्य॑चक्षय॒त् स्व॑ः ॥३॥

Tad devanam devatamaya kartvamashrathnan drilahavradanta vilita
Udga ajadabhinad brahmana valamaguhattamo vyachakshayat svah

24.4

अश्मा॑स्यमव॒तं ब्रह्म॑ण॒स्पति॒र्मधु॑धारम॒भि यमोज॒सातृ॑णत् ।
तमे॒व विश्वे॑ पपिरे स्व॒र्दृशो॑ ब॒हु सा॒कं सि॑सिचु॒रुत्स॑मु॒द्रिण॑म् ॥४॥

Ashmasyamavatam brahmanaspatirmadhudharamabhi yamojasatrinat
Tameva vishve papire svardrisho bahu sakam sisichurutsamudrinam

24.5

सना॒ ता का चि॒द् भुव॑ना॒ भवी॑त्वा मा॒द्भिः श॒रद्भि॒र्दुरो॑ वरन्त वः ।
अय॑तन्ता चरतो अ॒न्यद॑न्य॒दिद् या च॒कार॑ व॒युना॒ ब्रह्म॑ण॒स्पति॑ः ॥५॥

Sana ta ka chid bhuvana bhavitva madbhih sharadbhirduro varanta vah
Ayatanta charato anyadanyadid ya chakara vayuna brahmanaspatih

24.6

अ॒भि॒नक्ष॑न्तो अ॒भि ये तमा॑न॒शुर्नि॒धिं प॑णी॒नां प॑र॒मं गुहा॑ हि॒तम् ।
ते वि॒द्वांस॑ः प्रति॒चक्ष्यानृ॑ता॒ पुन॒र्यत॑ उ॒ आय॒न् तदुदी॑युरा॒विश॑म् ॥६॥

Abhinakshanto abhi ye tamanashurnidhim paninam paramam guha hitam
Te vidvansah pratichakshyanrita punaryata u ayan tadudiyuravisham

24.7

ऋ॒तावा॑नः प्रति॒चक्ष्यानृ॑ता॒ पुन॒रात॒ आ त॑स्थुः क॒वयो॑ म॒हस्प॒थः ।
ते बा॒हुभ्यां॑ धमि॒तम॒ग्निमश्म॑नि॒ नकि॒ः षो अ॒स्त्यर॑णो ज॒हुर्हि तम् ॥७॥

Ritavanah pratichakshyanrita punarata a tasthuh kavayo mahaspathah
Te bahubhyam dhamitamagnimashmani nakih sho astyarano jahurhi tam

24.8

ऋ॒तज्ये॑न क्षि॒प्रेण॒ ब्रह्म॑ण॒स्पति॒र्यत्र॒ वष्टि॒ प्र तद॑श्नोति॒ धन्व॑ना ।
तस्य॑ सा॒ध्वीरिष॑वो॒ याभि॒रस्य॑ति नृ॒चक्ष॑सो दृ॒शये॒ कर्ण॑योनयः ॥८॥

Ritajyena kshiprena brahmanaspatiryatra vashti pra tadashnoti dhanvana
Tasya sadhvirishavo yabhirasyati nrichakshaso drishaye karnayonayah

24.9

स सं॑न॒यः स वि॑न॒यः पु॒रोहि॑त॒ः स सुष्टु॑त॒ः स यु॒धि ब्रह्म॑ण॒स्पति॑ः ।
चा॒क्ष्मो यद् वाजं॒ भर॑ते म॒ती धना ऽऽदित् सूर्य॑स्तपति तप्य॒तुर्वृथा॑ ॥९॥

Sa sannayah sa vinayah purohitah sa sushtutah sa yudhi brahmanaspatih
Chakshmo yad vajam bharate mati dhana dit suryastapati tapyaturvritha

24.10

वि॒भु प्र॒भु प्र॑थ॒मं मे॒हना॑वतो॒ बृह॒स्पते॑ः सुवि॒दत्रा॑णि॒ राध्या॑ ।
इ॒मा सा॒तानि॑ वे॒न्यस्य॑ वा॒जिनो॒ येन॒ जना॑ उ॒भये॑ भुञ्ज॒ते विश॑ः ॥१०॥

Vibhu prabhu prathamam mehanavato brihaspateh suvidatrani radhya
Ima satani venyasya vajino yena jana ubhaye bhunjate vishah

24.11

योऽव॑रे वृ॒जने॑ वि॒श्वथा॑ वि॒भुर्म॒हामु॑ र॒ण्वः शव॑सा व॒वक्षि॑थ ।
स दे॒वो दे॒वान् प्रति॑ पप्रथे पृ॒थु विश्वेदु॒ ता प॑रि॒भूर्ब्रह्म॑ण॒स्पति॑ः ॥११॥

Yovare vrijane vishvatha vibhurmahamu ranvah shavasa vavakshitha
Sa devo devan prati paprathe prithu vishvedu ta paribhurbrahmanaspatih

24.12

विश्वं॑ स॒त्यं म॑घवाना यु॒वोरिदाप॑श्च॒न प्र मि॑नन्ति व्र॒तं वा॑म् ।
अच्छे॑न्द्राब्रह्मणस्पती ह॒विर्नो ऽन्नं॒ युजे॑व वा॒जिना॑ जिगातम् ॥१२॥

Vishvam satyam maghavana yuvoridapashchana pra minanti vratam vam
Achchhendrabrahmanaspati havirno nnam yujeva vajina jigatam

24.13

उ॒ताशि॑ष्ठा॒ अनु॑ शृण्वन्ति॒ वह्न॑यः स॒भेयो॒ विप्रो॑ भरते म॒ती धना॑ ।
वी॒ळु॒द्वेषा॒ अनु॒ वश॑ ऋ॒णमा॑द॒दिः स ह॑ वा॒जी स॑मि॒थे ब्रह्म॑ण॒स्पति॑ः ॥१३॥

Utashishtha anu shrinvanti vahnayah sabheyo vipro bharate mati dhana
Viludvesha anu vasha rinamadadih sa ha vaji samithe brahmanaspatih

24.14

ब्रह्म॑ण॒स्पते॑रभवद् यथाव॒शं स॒त्यो म॒न्युर्महि॒ कर्मा॑ करिष्य॒तः ।
यो गा उ॒दाज॒त् स दि॒वे वि चा॑भजन् म॒हीव॑ री॒तिः शव॑सासर॒त् पृथ॑क् ॥१४॥

Brahmanaspaterabhavad yathavasham satyo manyurmahi karma karishyatah
Yo ga udajat sa dive vi chabhajan mahiva ritih shavasasarat prithak

24.15

ब्रह्म॑णस्पते सु॒यम॑स्य वि॒श्वहा॑ रा॒यः स्या॑म र॒थ्यो॒३ वय॑स्वतः ।
वी॒रेषु॑ वी॒राँ उप॑ पृङ्धि न॒स्त्वं यदीशा॑नो॒ ब्रह्म॑णा॒ वेषि॑ मे॒ हव॑म् ॥१५॥

Brahmanaspate suyamasya vishvaha rayah syama rathyo3 vayasvatah
Vireshu viram upa prindhi nastvam yadishano brahmana veshi me havam

24.16

ब्रह्म॑णस्पते॒ त्वम॒स्य य॒न्ता सू॒क्तस्य॑ बोधि॒ तन॑यं च जिन्व ।
विश्वं॒ तद् भ॒द्रं यदव॑न्ति दे॒वा बृ॒हद् व॑देम वि॒दथे॑ सु॒वीरा॑ः ॥१६॥

Brahmanaspate tvamasya yanta suktasya bodhi tanayam cha jinva
Vishvam tad bhadram yadavanti deva brihad vadema vidathe suvirah