Sukta 84

84.1

7 manyustapasah, manyuh, jagati, 1-3 trishtup

त्वया॑ मन्यो स॒रथ॑मारु॒जन्तो॒ हर्ष॑माणासो धृषि॒ता म॑रुत्वः ।
ति॒ग्मेष॑व॒ आयु॑धा सं॒शिशा॑ना अ॒भि प्र य॑न्तु॒ नरो॑ अ॒ग्निरू॑पाः ॥१॥

Tvaya manyo sarathamarujanto harshamanaso dhrishita marutvah
Tigmeshava ayudha sanshishana abhi pra yantu naro agnirupah

अ॒ग्निरि॑व मन्यो त्विषि॒तः स॑हस्व सेना॒नीर्न॑ः सहुरे हू॒त ए॑धि ।
ह॒त्वाय॒ शत्रू॒न्वि भ॑जस्व॒ वेद॒ ओजो॒ मिमा॑नो॒ वि मृधो॑ नुदस्व ॥२॥

Agniriva manyo tvishitah sahasva senanirnah sahure huta edhi
Hatvaya shatrunvi bhajasva veda ojo mimano vi mridho nudasva

सह॑स्व मन्यो अ॒भिमा॑तिम॒स्मे रु॒जन्मृ॒णन्प्र॑मृ॒णन्प्रेहि॒ शत्रू॑न् ।
उ॒ग्रं ते॒ पाजो॑ न॒न्वा रु॑रुध्रे व॒शी वशं॑ नयस एकज॒ त्वम् ॥३॥

Sahasva manyo abhimatimasme rujanmrinanpramrinanprehi shatrun
Ugram te pajo nanva rurudhre vashi vasham nayasa ekaja tvam

एको॑ बहू॒नाम॑सि मन्यवीळि॒तो विशं॑विशं यु॒धये॒ सं शि॑शाधि ।
अकृ॑त्तरु॒क्त्वया॑ यु॒जा व॒यं द्यु॒मन्तं॒ घोषं॑ विज॒याय॑ कृण्महे ॥४॥

Eko bahunamasi manyavilito vishanvisham yudhaye sam shishadhi
Akrittaruktvaya yuja vayam dyumantam ghosham vijayaya krinmahe

वि॒जे॒ष॒कृदिन्द्र॑ इवानवब्र॒वो॒३ऽस्माकं॑ मन्यो अधि॒पा भ॑वे॒ह ।
प्रि॒यं ते॒ नाम॑ सहुरे गृणीमसि वि॒द्मा तमुत्सं॒ यत॑ आब॒भूथ॑ ॥५॥

Vijeshakridindra ivanavabravo3smakam manyo adhipa bhaveha
Priyam te nama sahure grinimasi vidma tamutsam yata ababhutha

आभू॑त्या सह॒जा व॑ज्र सायक॒ सहो॑ बिभर्ष्यभिभूत॒ उत्त॑रम् ।
क्रत्वा॑ नो मन्यो स॒ह मे॒द्ये॑धि महाध॒नस्य॑ पुरुहूत सं॒सृजि॑ ॥६॥

Abhutya sahaja vajra sayaka saho bibharshyabhibhuta uttaram
Kratva no manyo saha medyedhi mahadhanasya puruhuta sansriji

संसृ॑ष्टं॒ धन॑मु॒भयं॑ स॒माकृ॑तम॒स्मभ्यं॑ दत्तां॒ वरु॑णश्च म॒न्युः ।
भियं॒ दधा॑ना॒ हृद॑येषु॒ शत्र॑व॒ः परा॑जितासो॒ अप॒ नि ल॑यन्ताम् ॥७॥

Sansrishtam dhanamubhayam samakritamasmabhyam dattam varunashcha manyuh
Bhiyam dadhana hridayeshu shatravah parajitaso apa ni layantam