Sukta 83

83.1

7 manyustapasah, manyuh, trishtup, 1 jagati

यस्ते॑ म॒न्योऽवि॑धद्वज्र सायक॒ सह॒ ओज॑ः पुष्यति॒ विश्व॑मानु॒षक् ।
सा॒ह्याम॒ दास॒मार्यं॒ त्वया॑ यु॒जा सह॑स्कृतेन॒ सह॑सा॒ सह॑स्वता ॥१॥

Yaste manyovidhadvajra sayaka saha ojah pushyati vishvamanushak
Sahyama dasamaryam tvaya yuja sahaskritena sahasa sahasvata

म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।
म॒न्युं विश॑ ईळते॒ मानु॑षी॒र्याः पा॒हि नो॑ मन्यो॒ तप॑सा स॒जोषा॑ः ॥२॥

Manyurindro manyurevasa devo manyurhota varuno jatavedah
Manyum visha ilate manushiryah pahi no manyo tapasa sajoshah

अ॒भी॑हि मन्यो त॒वस॒स्तवी॑या॒न्तप॑सा यु॒जा वि ज॑हि॒ शत्रू॑न् ।
अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं न॑ः ॥३॥

Abhihi manyo tavasastaviyantapasa yuja vi jahi shatrun
Amitraha vritraha dasyuha cha vishva vasunya bhara tvam nah

त्वं हि म॑न्यो अ॒भिभू॑त्योजाः स्वय॒म्भूर्भामो॑ अभिमातिषा॒हः ।
वि॒श्वच॑र्षणि॒ः सहु॑रि॒ः सहा॑वान॒स्मास्वोज॒ः पृत॑नासु धेहि ॥४॥

Tvam hi manyo abhibhutyojah svayambhurbhamo abhimatishahah
Vishvacharshanih sahurih sahavanasmasvojah pritanasu dhehi

अ॒भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।
तं त्वा॑ मन्यो अक्र॒तुर्जि॑हीळा॒हं स्वा त॒नूर्ब॑ल॒देया॑य॒ मेहि॑ ॥५॥

Abhagah sannapa pareto asmi tava kratva tavishasya prachetah
Tam tva manyo akraturjihilaham sva tanurbaladeyaya mehi

अ॒यं ते॑ अ॒स्म्युप॒ मेह्य॒र्वाङ्प्र॑तीची॒नः स॑हुरे विश्वधायः ।
मन्यो॑ वज्रिन्न॒भि मामा व॑वृत्स्व॒ हना॑व॒ दस्यूँ॑रु॒त बो॑ध्या॒पेः ॥६॥

Ayam te asmyupa mehyarvanpratichinah sahure vishvadhayah
Manyo vajrinnabhi mama vavritsva hanava dasyunruta bodhyapeh

अ॒भि प्रेहि॑ दक्षिण॒तो भ॑वा॒ मेऽधा॑ वृ॒त्राणि॑ जङ्घनाव॒ भूरि॑ ।
जु॒होमि॑ ते ध॒रुणं॒ मध्वो॒ अग्र॑मु॒भा उ॑पां॒शु प्र॑थ॒मा पि॑बाव ॥७॥

Abhi prehi dakshinato bhava medha vritrani janghanava bhuri
Juhomi te dharunam madhvo agramubha upanshu prathama pibava