Sukta 165

165.1

5 nairirtah kapotah, vishvedevah, trishtup

देवा॑ः क॒पोत॑ इषि॒तो यदि॒च्छन्दू॒तो निॠ॑त्या इ॒दमा॑ज॒गाम॑ ।
तस्मा॑ अर्चाम कृ॒णवा॑म॒ निष्कृ॑तिं॒ शं नो॑ अस्तु द्वि॒पदे॒ शं चतु॑ष्पदे ॥१॥

Devah kapota ishito yadichchhanduto niritya idamajagama
Tasma archama krinavama nishkritim sham no astu dvipade sham chatushpade

शि॒वः क॒पोत॑ इषि॒तो नो॑ अस्त्वना॒गा दे॑वाः शकु॒नो गृ॒हेषु॑ ।
अ॒ग्निर्हि विप्रो॑ जु॒षतां॑ ह॒विर्न॒ः परि॑ हे॒तिः प॒क्षिणी॑ नो वृणक्तु ॥२॥

Shivah kapota ishito no astvanaga devah shakuno griheshu
Agnirhi vipro jushatam havirnah pari hetih pakshini no vrinaktu

हे॒तिः प॒क्षिणी॒ न द॑भात्य॒स्माना॒ष्ट्र्यां प॒दं कृ॑णुते अग्नि॒धाने॑ ।
शं नो॒ गोभ्य॑श्च॒ पुरु॑षेभ्यश्चास्तु॒ मा नो॑ हिंसीदि॒ह दे॑वाः क॒पोत॑ः ॥३॥

Hetih pakshini na dabhatyasmanashtryam padam krinute agnidhane
Sham no gobhyashcha purushebhyashchastu ma no hinsidiha devah kapotah

यदुलू॑को॒ वद॑ति मो॒घमे॒तद्यत्क॒पोत॑ः प॒दम॒ग्नौ कृ॒णोति॑ ।
यस्य॑ दू॒तः प्रहि॑त ए॒ष ए॒तत्तस्मै॑ य॒माय॒ नमो॑ अस्तु मृ॒त्यवे॑ ॥४॥

Yaduluko vadati moghametadyatkapotah padamagnau krinoti
Yasya dutah prahita esha etattasmai yamaya namo astu mrityave

ऋ॒चा क॒पोतं॑ नुदत प्र॒णोद॒मिषं॒ मद॑न्त॒ः परि॒ गां न॑यध्वम् ।
सं॒यो॒पय॑न्तो दुरि॒तानि॒ विश्वा॑ हि॒त्वा न॒ ऊर्जं॒ प्र प॑ता॒त्पति॑ष्ठः ॥५॥

Richa kapotam nudata pranodamisham madantah pari gam nayadhvam
Sanyopayanto duritani vishva hitva na urjam pra patatpatishthah