Sukta 148

148.1

5 prithurvainyah, indrah, trishtup

सु॒ष्वा॒णास॑ इन्द्र स्तु॒मसि॑ त्वा सस॒वांस॑श्च तुविनृम्ण॒ वाज॑म् ।
आ नो॑ भर सुवि॒तं यस्य॑ चा॒कन्त्मना॒ तना॑ सनुयाम॒ त्वोता॑ः ॥१॥

Sushvanasa indra stumasi tva sasavansashcha tuvinrimna vajam
A no bhara suvitam yasya chakantmana tana sanuyama tvotah

ऋ॒ष्वस्त्वमि॑न्द्र शूर जा॒तो दासी॒र्विश॒ः सूर्ये॑ण सह्याः ।
गुहा॑ हि॒तं गुह्यं॑ गू॒ळ्हम॒प्सु बि॑भृ॒मसि॑ प्र॒स्रव॑णे॒ न सोम॑म् ॥२॥

Rishvastvamindra shura jato dasirvishah suryena sahyah
Guha hitam guhyam gulhamapsu bibhrimasi prasravane na somam

अ॒र्यो वा॒ गिरो॑ अ॒भ्य॑र्च वि॒द्वानृषी॑णां॒ विप्र॑ः सुम॒तिं च॑का॒नः ।
ते स्या॑म॒ ये र॒णय॑न्त॒ सोमै॑रे॒नोत तुभ्यं॑ रथोळ्ह भ॒क्षैः ॥३॥

Aryo va giro abhyarcha vidvanrishinam viprah sumatim chakanah
Te syama ye ranayanta somairenota tubhyam ratholha bhakshaih

इ॒मा ब्रह्मे॑न्द्र॒ तुभ्यं॑ शंसि॒ दा नृभ्यो॑ नृ॒णां शू॑र॒ शव॑ः ।
तेभि॑र्भव॒ सक्र॑तु॒र्येषु॑ चा॒कन्नु॒त त्रा॑यस्व गृण॒त उ॒त स्तीन् ॥४॥

Ima brahmendra tubhyam shansi da nribhyo nrinam shura shavah
Tebhirbhava sakraturyeshu chakannuta trayasva grinata uta stin

श्रु॒धी हव॑मिन्द्र शूर॒ पृथ्या॑ उ॒त स्त॑वसे वे॒न्यस्या॒र्कैः ।
आ यस्ते॒ योनिं॑ घृ॒तव॑न्त॒मस्वा॑रू॒र्मिर्न निम्नैर्द्र॑वयन्त॒ वक्वा॑ः ॥५॥

Shrudhi havamindra shura prithya uta stavase venyasyarkaih
A yaste yonim ghritavantamasvarurmirna nimnairdravayanta vakvah