Sukta 147

147.1

5 suvedah shairishih, indrah, jagati, 5 trishtup

श्रत्ते॑ दधामि प्रथ॒माय॑ म॒न्यवेऽह॒न्यद्वृ॒त्रं नर्यं॑ वि॒वेर॒पः ।
उ॒भे यत्त्वा॒ भव॑तो॒ रोद॑सी॒ अनु॒ रेज॑ते॒ शुष्मा॑त्पृथि॒वी चि॑दद्रिवः ॥१॥

Shratte dadhami prathamaya manyavehanyadvritram naryam viverapah
Ubhe yattva bhavato rodasi anu rejate shushmatprithivi chidadrivah

147.2

त्वं मा॒याभि॑रनवद्य मा॒यिनं॑ श्रवस्य॒ता मन॑सा वृ॒त्रम॑र्दयः ।
त्वामिन्नरो॑ वृणते॒ गवि॑ष्टिषु॒ त्वां विश्वा॑सु॒ हव्या॒स्विष्टि॑षु ॥२॥

Tvam mayabhiranavadya mayinam shravasyata manasa vritramardayah
Tvaminnaro vrinate gavishtishu tvam vishvasu havyasvishtishu

147.3

ऐषु॑ चाकन्धि पुरुहूत सू॒रिषु॑ वृ॒धासो॒ ये म॑घवन्नान॒शुर्म॒घम् ।
अर्च॑न्ति तो॒के तन॑ये॒ परि॑ष्टिषु मे॒धसा॑ता वा॒जिन॒मह्र॑ये॒ धने॑ ॥३॥

Aishu chakandhi puruhuta surishu vridhaso ye maghavannanashurmagham
Archanti toke tanaye parishtishu medhasata vajinamahraye dhane

147.4

स इन्नु रा॒यः सुभृ॑तस्य चाकन॒न्मदं॒ यो अ॑स्य॒ रंह्यं॒ चिके॑तति ।
त्वावृ॑धो मघवन्दा॒श्व॑ध्वरो म॒क्षू स वाजं॑ भरते॒ धना॒ नृभि॑ः ॥४॥

Sa innu rayah subhritasya chakananmadam yo asya ranhyam chiketati
Tvavridho maghavandashvadhvaro makshu sa vajam bharate dhana nribhih

147.5

त्वं शर्धा॑य महि॒ना गृ॑णा॒न उ॒रु कृ॑धि मघवञ्छ॒ग्धि रा॒यः ।
त्वं नो॑ मि॒त्रो वरु॑णो॒ न मा॒यी पि॒त्वो न द॑स्म दयसे विभ॒क्ता ॥५॥

Tvam shardhaya mahina grinana uru kridhi maghavanchhagdhi rayah
Tvam no mitro varuno na mayi pitvo na dasma dayase vibhakta