Sukta 14

14.1

16 vaivasvato yamah, yamah, 6 angirahpitratharvabhrigusomah, 7-9 lingoktadevatah pitaro va, 10-12 shvanau, trishtup, 13, 14, 16, anushtup, 15brihati

प॒रे॒यि॒वांसं॑ प्र॒वतो॑ म॒हीरनु॑ ब॒हुभ्य॒ः पन्था॑मनुपस्पशा॒नम् ।
वै॒व॒स्व॒तं सं॒गम॑नं॒ जना॑नां य॒मं राजा॑नं ह॒विषा॑ दुवस्य ॥१॥

Pareyivansam pravato mahiranu bahubhyah panthamanupaspashanam
Vaivasvatam sangamanam jananam yamam rajanam havisha duvasya

14.2

य॒मो नो॑ गा॒तुं प्र॑थ॒मो वि॑वेद॒ नैषा गव्यू॑ति॒रप॑भर्त॒वा उ॑ ।
यत्रा॑ न॒ः पूर्वे॑ पि॒तर॑ः परे॒युरे॒ना ज॑ज्ञा॒नाः प॒थ्या॒३ अनु॒ स्वाः ॥२॥

Yamo no gatum prathamo viveda naisha gavyutirapabhartava u
Yatra nah purve pitarah pareyurena jagyanah pathya3 anu svah

14.3

मात॑ली क॒व्यैर्य॒मो अङ्गि॑रोभि॒र्बृह॒स्पति॒ॠक्व॑भिर्वावृधा॒नः ।
याँश्च॑ दे॒वा वा॑वृ॒धुर्ये च॑ दे॒वान्त्स्वाहा॒न्ये स्व॒धया॒न्ये म॑दन्ति ॥३॥

Matali kavyairyamo angirobhirbrihaspatirikvabhirvavridhanah
Yanshcha deva vavridhurye cha devantsvahanye svadhayanye madanti

14.4

इ॒मं य॑म प्रस्त॒रमा हि सीदाऽङ्गि॑रोभिः पि॒तृभि॑ः संविदा॒नः ।
आ त्वा॒ मन्त्रा॑ः कविश॒स्ता व॑हन्त्वे॒ना रा॑जन्ह॒विषा॑ मादयस्व ॥४॥

Imam yama prastarama hi sidangirobhih pitribhih sanvidanah
A tva mantrah kavishasta vahantvena rajanhavisha madayasva

14.5

अङ्गि॑रोभि॒रा ग॑हि य॒ज्ञिये॑भि॒र्यम॑ वैरू॒पैरि॒ह मा॑दयस्व ।
विव॑स्वन्तं हुवे॒ यः पि॒ता ते॒ऽस्मिन्य॒ज्ञे ब॒र्हिष्या नि॒षद्य॑ ॥५॥

Angirobhira gahi yagyiyebhiryama vairupairiha madayasva
Vivasvantam huve yah pita tesminyagye barhishya nishadya

14.6

अङ्गि॑रसो नः पि॒तरो॒ नव॑ग्वा॒ अथ॑र्वाणो॒ भृग॑वः सो॒म्यास॑ः ।
तेषां॑ व॒यं सु॑म॒तौ य॒ज्ञिया॑ना॒मपि॑ भ॒द्रे सौ॑मन॒से स्या॑म ॥६॥

Angiraso nah pitaro navagva atharvano bhrigavah somyasah
Tesham vayam sumatau yagyiyanamapi bhadre saumanase syama

14.7

प्रेहि॒ प्रेहि॑ प॒थिभि॑ः पू॒र्व्येभि॒र्यत्रा॑ न॒ः पूर्वे॑ पि॒तर॑ः परे॒युः ।
उ॒भा राजा॑ना स्व॒धया॒ मद॑न्ता य॒मं प॑श्यासि॒ वरु॑णं च दे॒वम् ॥७॥

Prehi prehi pathibhih purvyebhiryatra nah purve pitarah pareyuh
Ubha rajana svadhaya madanta yamam pashyasi varunam cha devam

14.8

सं ग॑च्छस्व पि॒तृभि॒ः सं य॒मेने॑ष्टापू॒र्तेन॑ पर॒मे व्यो॑मन् ।
हि॒त्वाया॑व॒द्यं पुन॒रस्त॒मेहि॒ सं ग॑च्छस्व त॒न्वा॑ सु॒वर्चा॑ः ॥८॥

Sam gachchhasva pitribhih sam yameneshtapurtena parame vyoman
Hitvayavadyam punarastamehi sam gachchhasva tanva suvarchah

14.9

अपे॑त॒ वी॑त॒ वि च॑ सर्प॒तातो॒ऽस्मा ए॒तं पि॒तरो॑ लो॒कम॑क्रन् ।
अहो॑भिर॒द्भिर॒क्तुभि॒र्व्य॑क्तं य॒मो द॑दात्यव॒सान॑मस्मै ॥९॥

Apeta vita vi cha sarpatatosma etam pitaro lokamakran
Ahobhiradbhiraktubhirvyaktam yamo dadatyavasanamasmai

14.10

अति॑ द्रव सारमे॒यौ श्वानौ॑ चतुर॒क्षौ श॒बलौ॑ सा॒धुना॑ प॒था ।
अथा॑ पि॒तॄन्त्सु॑वि॒दत्राँ॒ उपे॑हि य॒मेन॒ ये स॑ध॒मादं॒ मद॑न्ति ॥१०॥

Ati drava sarameyau shvanau chaturakshau shabalau sadhuna patha
Atha pitrintsuvidatram upehi yamena ye sadhamadam madanti

14.11

यौ ते॒ श्वानौ॑ यम रक्षि॒तारौ॑ चतुर॒क्षौ प॑थि॒रक्षी॑ नृ॒चक्ष॑सौ ।
ताभ्या॑मेनं॒ परि॑ देहि राजन्त्स्व॒स्ति चा॑स्मा अनमी॒वं च॑ धेहि ॥११॥

Yau te shvanau yama rakshitarau chaturakshau pathirakshi nrichakshasau
Tabhyamenam pari dehi rajantsvasti chasma anamivam cha dhehi

14.12

उ॒रू॒ण॒साव॑सु॒तृपा॑ उदुम्ब॒लौ य॒मस्य॑ दू॒तौ च॑रतो॒ जनाँ॒ अनु॑ ।
ताव॒स्मभ्यं॑ दृ॒शये॒ सूर्या॑य॒ पुन॑र्दाता॒मसु॑म॒द्येह भ॒द्रम् ॥१२॥

Urunasavasutripa udumbalau yamasya dutau charato janam anu
Tavasmabhyam drishaye suryaya punardatamasumadyeha bhadram

14.13

य॒माय॒ सोमं॑ सुनुत य॒माय॑ जुहुता ह॒विः । य॒मं ह॑ य॒ज्ञो ग॑च्छत्य॒ग्निदू॑तो॒ अरं॑कृतः ॥१३॥

Yamaya somam sunuta yamaya juhuta havih, yamam ha yagyo gachchhatyagniduto arankritah

14.14

य॒माय॑ घृ॒तव॑द्ध॒विर्जु॒होत॒ प्र च॑ तिष्ठत । स नो॑ दे॒वेष्वा य॑मद्दी॒र्घमायु॒ः प्र जी॒वसे॑ ॥१४॥

Yamaya ghritavaddhavirjuhota pra cha tishthata, sa no deveshva yamaddirghamayuh pra jivase

14.15

य॒माय॒ मधु॑मत्तमं॒ राज्ञे॑ ह॒व्यं जु॑होतन । इ॒दं नम॒ ऋषि॑भ्यः पूर्व॒जेभ्य॒ः पूर्वे॑भ्यः पथि॒कृद्भ्य॑ः ॥१५॥

Yamaya madhumattamam ragye havyam juhotana, idam nama rishibhyah purvajebhyah purvebhyah pathikridbhyah

14.16

त्रिक॑द्रुकेभिः पतति॒ षळु॒र्वीरेक॒मिद्बृ॒हत् । त्रि॒ष्टुब्गा॑य॒त्री छन्दां॑सि॒ सर्वा॒ ता य॒म आहि॑ता ॥१६॥

Trikadrukebhih patati shalurvirekamidbrihat, trishtubgayatri chhandansi sarva ta yama ahita