Sukta 15

15.1

14 shankho yamayanah, pitarah, trishtup, 11 jagati

उदी॑रता॒मव॑र॒ उत्परा॑स॒ उन्म॑ध्य॒माः पि॒तर॑ः सो॒म्यास॑ः ।
असुं॒ य ई॒युर॑वृ॒का ऋ॑त॒ज्ञास्ते नो॑ऽवन्तु पि॒तरो॒ हवे॑षु ॥१॥

Udiratamavara utparasa unmadhyamah pitarah somyasah
Asum ya iyuravrika ritagyaste novantu pitaro haveshu

इ॒दं पि॒तृभ्यो॒ नमो॑ अस्त्व॒द्य ये पूर्वा॑सो॒ य उप॑रास ई॒युः ।
ये पार्थि॑वे॒ रज॒स्या निष॑त्ता॒ ये वा॑ नू॒नं सु॑वृ॒जना॑सु वि॒क्षु ॥२॥

Idam pitribhyo namo astvadya ye purvaso ya uparasa iyuh
Ye parthive rajasya nishatta ye va nunam suvrijanasu vikshu

आहं पि॒तॄन्त्सु॑वि॒दत्राँ॑ अवित्सि॒ नपा॑तं च वि॒क्रम॑णं च॒ विष्णो॑ः ।
ब॒र्हि॒षदो॒ ये स्व॒धया॑ सु॒तस्य॒ भज॑न्त पि॒त्वस्त इ॒हाग॑मिष्ठाः ॥३॥

Aham pitrintsuvidatram avitsi napatam cha vikramanam cha vishnoh
Barhishado ye svadhaya sutasya bhajanta pitvasta ihagamishthah

बर्हि॑षदः पितर ऊ॒त्य१र्वागि॒मा वो॑ ह॒व्या च॑कृमा जु॒षध्व॑म् ।
त आ ग॒ताव॑सा॒ शंत॑मे॒नाऽथा॑ न॒ः शं योर॑र॒पो द॑धात ॥४॥

Barhishadah pitara utya1rvagima vo havya chakrima jushadhvam
Ta a gatavasa shantamenatha nah sham yorarapo dadhata

उप॑हूताः पि॒तर॑ः सो॒म्यासो॑ बर्हि॒ष्ये॑षु नि॒धिषु॑ प्रि॒येषु॑ ।
त आ ग॑मन्तु॒ त इ॒ह श्रु॑व॒न्त्वधि॑ ब्रुवन्तु॒ ते॑ऽवन्त्व॒स्मान् ॥५॥

Upahutah pitarah somyaso barhishyeshu nidhishu priyeshu
Ta a gamantu ta iha shruvantvadhi bruvantu tevantvasman

आच्या॒ जानु॑ दक्षिण॒तो नि॒षद्ये॒मं य॒ज्ञम॒भि गृ॑णीत॒ विश्वे॑ ।
मा हिं॑सिष्ट पितर॒ः केन॑ चिन्नो॒ यद्व॒ आग॑ः पुरु॒षता॒ करा॑म ॥६॥

Achya janu dakshinato nishadyemam yagyamabhi grinita vishve
Ma hinsishta pitarah kena chinno yadva agah purushata karama

आसी॑नासो अरु॒णीना॑मु॒पस्थे॑ र॒यिं ध॑त्त दा॒शुषे॒ मर्त्या॑य ।
पु॒त्रेभ्य॑ः पितर॒स्तस्य॒ वस्व॒ः प्र य॑च्छत॒ त इ॒होर्जं॑ दधात ॥७॥

Asinaso aruninamupasthe rayim dhatta dashushe martyaya
Putrebhyah pitarastasya vasvah pra yachchhata ta ihorjam dadhata

ये न॒ः पूर्वे॑ पि॒तर॑ः सो॒म्यासो॑ऽनूहि॒रे सो॑मपी॒थं वसि॑ष्ठाः ।
तेभि॑र्य॒मः सं॑ररा॒णो ह॒वींष्यु॒शन्नु॒शद्भि॑ः प्रतिका॒मम॑त्तु ॥८॥

Ye nah purve pitarah somyasonuhire somapitham vasishthah
Tebhiryamah sanrarano havinshyushannushadbhih pratikamamattu

ये ता॑तृ॒षुर्दे॑व॒त्रा जेह॑माना होत्रा॒विद॒ः स्तोम॑तष्टासो अ॒र्कैः ।
आग्ने॑ याहि सुवि॒दत्रे॑भिर॒र्वाङ्स॒त्यैः क॒व्यैः पि॒तृभि॑र्घर्म॒सद्भि॑ः ॥९॥

Ye tatrishurdevatra jehamana hotravidah stomatashtaso arkaih
Agne yahi suvidatrebhirarvansatyaih kavyaih pitribhirgharmasadbhih

ये स॒त्यासो॑ हवि॒रदो॑ हवि॒ष्पा इन्द्रे॑ण दे॒वैः स॒रथं॒ दधा॑नाः ।
आग्ने॑ याहि स॒हस्रं॑ देवव॒न्दैः परै॒ः पूर्वै॑ः पि॒तृभि॑र्घर्म॒सद्भि॑ः ॥१०॥

Ye satyaso havirado havishpa indrena devaih saratham dadhanah
Agne yahi sahasram devavandaih paraih purvaih pitribhirgharmasadbhih

अग्नि॑ष्वात्ताः पितर॒ एह ग॑च्छत॒ सद॑ःसदः सदत सुप्रणीतयः ।
अ॒त्ता ह॒वींषि॒ प्रय॑तानि ब॒र्हिष्यथा॑ र॒यिं सर्व॑वीरं दधातन ॥११॥

Agnishvattah pitara eha gachchhata sadahsadah sadata supranitayah
Atta havinshi prayatani barhishyatha rayim sarvaviram dadhatana

त्वम॑ग्न ईळि॒तो जा॑तवे॒दोऽवा॑ड्ढ॒व्यानि॑ सुर॒भीणि॑ कृ॒त्वी ।
प्रादा॑ः पि॒तृभ्य॑ः स्व॒धया॒ ते अ॑क्षन्न॒द्धि त्वं दे॑व॒ प्रय॑ता ह॒वींषि॑ ॥१२॥

Tvamagna ilito jatavedovaddhavyani surabhini kritvi
Pradah pitribhyah svadhaya te akshannaddhi tvam deva prayata havinshi

ये चे॒ह पि॒तरो॒ ये च॒ नेह याँश्च॑ वि॒द्म याँ उ॑ च॒ न प्र॑वि॒द्म ।
त्वं वे॑त्थ॒ यति॒ ते जा॑तवेदः स्व॒धाभि॑र्य॒ज्ञं सुकृ॑तं जुषस्व ॥१३॥

Ye cheha pitaro ye cha neha yanshcha vidma yam u cha na pravidma
Tvam vettha yati te jatavedah svadhabhiryagyam sukritam jushasva

ये अ॑ग्निद॒ग्धा ये अन॑ग्निदग्धा॒ मध्ये॑ दि॒वः स्व॒धया॑ मा॒दय॑न्ते ।
तेभि॑ः स्व॒राळसु॑नीतिमे॒तां य॑थाव॒शं त॒न्वं॑ कल्पयस्व ॥१४॥

Ye agnidagdha ye anagnidagdha madhye divah svadhaya madayante
Tebhih svaralasunitimetam yathavasham tanvam kalpayasva