Sukta 134

134.1

7, 1-6 (purvardhasya) mandhata yauvanashvah, 6 (uttarardhasya) 7 godha rishika, indrah, mahapanktih, 7 panktih

उ॒भे यदि॑न्द्र॒ रोद॑सी आप॒प्राथो॒षा इ॑व ।
म॒हान्तं॑ त्वा म॒हीनां॑ स॒म्राजं॑ चर्षणी॒नां दे॒वी जनि॑त्र्यजीजनद्भ॒द्रा जनि॑त्र्यजीजनत् ॥१॥

Ubhe yadindra rodasi apaprathosha iva
Mahantam tva mahinam samrajam charshaninam devi janitryajijanadbhadra janitryajijanat

134.2

अव॑ स्म दुर्हणाय॒तो मर्त॑स्य तनुहि स्थि॒रम् ।
अ॒ध॒स्प॒दं तमीं॑ कृधि॒ यो अ॒स्माँ आ॒दिदे॑शति दे॒वी जनि॑त्र्यजीजनद्भ॒द्रा जनि॑त्र्यजीजनत् ॥२॥

Ava sma durhanayato martasya tanuhi sthiram
Adhaspadam tamim kridhi yo asmam adideshati devi janitryajijanadbhadra janitryajijanat

134.3

अव॒ त्या बृ॑ह॒तीरिषो॑ वि॒श्वश्च॑न्द्रा अमित्रहन् ।
शची॑भिः शक्र धूनु॒हीन्द्र॒ विश्वा॑भिरू॒तिभि॑र्दे॒वी जनि॑त्र्यजीजनद्भ॒द्रा जनि॑त्र्यजीजनत् ॥४॥

Ava tya brihatirisho vishvashchandra amitrahan
Shachibhih shakra dhunuhindra vishvabhirutibhirdevi janitryajijanadbhadra janitryajijanat

134.4

अव॒ यत्त्वं श॑तक्रत॒विन्द्र॒ विश्वा॑नि धूनु॒षे ।
र॒यिं न सु॑न्व॒ते सचा॑ सह॒स्रिणी॑भिरू॒तिभि॑र्दे॒वी जनि॑त्र्यजीजनद्भ॒द्रा जनि॑त्र्यजीजनत् ॥४॥

Ava yattvam shatakratavindra vishvani dhunushe
Rayim na sunvate sacha sahasrinibhirutibhirdevi janitryajijanadbhadra janitryajijanat

134.5

अव॒ स्वेदा॑ इवा॒भितो॒ विष्व॑क्पतन्तु दि॒द्यव॑ः ।
दूर्वा॑या इव॒ तन्त॑वो॒ व्य१स्मदे॑तु दुर्म॒तिर्दे॒वी जनि॑त्र्यजीजनद्भ॒द्रा जनि॑त्र्यजीजनत् ॥५॥

Ava sveda ivabhito vishvakpatantu didyavah
Durvaya iva tantavo vya1smadetu durmatirdevi janitryajijanadbhadra janitryajijanat

134.6

दी॒र्घं ह्य॑ङ्कु॒शं य॑था॒ शक्तिं॒ बिभ॑र्षि मन्तुमः ।
पूर्वे॑ण मघवन्प॒दाऽजो व॒यां यथा॑ यमो दे॒वी जनि॑त्र्यजीजनद्भ॒द्रा जनि॑त्र्यजीजनत् ॥६॥

Dirgham hyankusham yatha shaktim bibharshi mantumah
Purvena maghavanpadajo vayam yatha yamo devi janitryajijanadbhadra janitryajijanat

134.7

नकि॑र्देवा मिनीमसि॒ नकि॒रा यो॑पयामसि मन्त्र॒श्रुत्यं॑ चरामसि ।
प॒क्षेभि॑रपिक॒क्षेभि॒रत्रा॒भि सं र॑भामहे ॥७॥

Nakirdeva minimasi nakira yopayamasi mantrashrutyam charamasi
Pakshebhirapikakshebhiratrabhi sam rabhamahe