Sukta 133

133.1

7 sudah paijavanah, indrah, shakkari, 4-6 mahapanktih, 7 trishtup

प्रो ष्व॑स्मै पुरोर॒थमिन्द्रा॑य शू॒षम॑र्चत ।
अ॒भीके॑ चिदु लोक॒कृत्सं॒गे स॒मत्सु॑ वृत्र॒हाऽस्माकं॑ बोधि चोदि॒ता नभ॑न्तामन्य॒केषां॑ ज्या॒का अधि॒ धन्व॑सु ॥१॥

Pro shvasmai purorathamindraya shushamarchata
Abhike chidu lokakritsange samatsu vritrahasmakam bodhi chodita nabhantamanyakesham jyaka adhi dhanvasu

133.2

त्वं सिन्धूँ॒रवा॑सृजोऽध॒राचो॒ अह॒न्नहि॑म् ।
अ॒श॒त्रुरि॑न्द्र जज्ञिषे॒ विश्वं॑ पुष्यसि॒ वार्यं॒ तं त्वा॒ परि॑ ष्वजामहे॒ नभ॑न्तामन्य॒केषां॑ ज्या॒का अधि॒ धन्व॑सु ॥२॥

Tvam sindhunravasrijodharacho ahannahim
Ashatrurindra jagyishe vishvam pushyasi varyam tam tva pari shvajamahe nabhantamanyakesham jyaka adhi dhanvasu

133.3

वि षु विश्वा॒ अरा॑तयो॒ऽर्यो न॑शन्त नो॒ धिय॑ः ।
अस्ता॑सि॒ शत्र॑वे व॒धं यो न॑ इन्द्र॒ जिघां॑सति॒ या ते॑ रा॒तिर्द॒दिर्वसु॒ नभ॑न्तामन्य॒केषां॑ ज्या॒का अधि॒ धन्व॑सु ॥३॥

Vi shu vishva aratayoryo nashanta no dhiyah
Astasi shatrave vadham yo na indra jighansati ya te ratirdadirvasu nabhantamanyakesham jyaka adhi dhanvasu

133.4

यो न॑ इन्द्रा॒भितो॒ जनो॑ वृका॒युरा॒दिदे॑शति ।
अ॒ध॒स्प॒दं तमीं॑ कृधि विबा॒धो अ॑सि सास॒हिर्नभ॑न्तामन्य॒केषां॑ ज्या॒का अधि॒ धन्व॑सु ॥४॥

Yo na indrabhito jano vrikayuradideshati
Adhaspadam tamim kridhi vibadho asi sasahirnabhantamanyakesham jyaka adhi dhanvasu

133.5

यो न॑ इन्द्राभि॒दास॑ति॒ सना॑भि॒र्यश्च॒ निष्ट्य॑ः ।
अव॒ तस्य॒ बलं॑ तिर म॒हीव॒ द्यौरध॒ त्मना॒ नभ॑न्तामन्य॒केषां॑ ज्या॒का अधि॒ धन्व॑सु ॥५॥

Yo na indrabhidasati sanabhiryashcha nishtyah
Ava tasya balam tira mahiva dyauradha tmana nabhantamanyakesham jyaka adhi dhanvasu

133.6

व॒यमि॑न्द्र त्वा॒यव॑ः सखि॒त्वमा र॑भामहे ।
ऋ॒तस्य॑ नः प॒था न॒याऽति॒ विश्वा॑नि दुरि॒ता नभ॑न्तामन्य॒केषां॑ ज्या॒का अधि॒ धन्व॑सु ॥६॥

Vayamindra tvayavah sakhitvama rabhamahe
Ritasya nah patha nayati vishvani durita nabhantamanyakesham jyaka adhi dhanvasu

133.7

अ॒स्मभ्यं॒ सु त्वमि॑न्द्र॒ तां शि॑क्ष॒ या दोह॑ते॒ प्रति॒ वरं॑ जरि॒त्रे ।
अच्छि॑द्रोध्नी पी॒पय॒द्यथा॑ नः स॒हस्र॑धारा॒ पय॑सा म॒ही गौः ॥७॥

Asmabhyam su tvamindra tam shiksha ya dohate prati varam jaritre
Achchhidrodhni pipayadyatha nah sahasradhara payasa mahi gauh