Sukta 60

60.1

5 nodha gautamah, agnih, trishtup

वह्निं॑ य॒शसं॑ वि॒दथ॑स्य के॒तुं सु॑प्रा॒व्यं॑ दू॒तं स॒द्योअ॑र्थम् ।
द्वि॒जन्मा॑नं र॒यिमि॑व प्रश॒स्तं रा॒तिं भ॑र॒द् भृग॑वे मात॒रिश्वा॑ ॥१॥

Vahnim yashasam vidathasya ketum supravyam dutam sadyoartham
Dvijanmanam rayimiva prashastam ratim bharad bhrigave matarishva

60.2

अ॒स्य शासु॑रु॒भया॑सः सचन्ते ह॒विष्म॑न्त उ॒शिजो॒ ये च॒ मर्ता॑ः ।
दि॒वश्चि॒त् पूर्वो॒ न्य॑सादि॒ होता॒ ऽऽपृच्छ्यो॑ वि॒श्पति॑र्वि॒क्षु वे॒धाः ॥२॥

Asya shasurubhayasah sachante havishmanta ushijo ye cha martah
Divashchit purvo nyasadi hota prichchhyo vishpatirvikshu vedhah

60.3

तं नव्य॑सी हृ॒द आ जाय॑मानम॒स्मत् सु॑की॒र्तिर्मधु॑जिह्वमश्याः ।
यमृ॒त्विजो॑ वृ॒जने॒ मानु॑षास॒ः प्रय॑स्वन्त आ॒यवो॒ जीज॑नन्त ॥३॥

Tam navyasi hrida a jayamanamasmat sukirtirmadhujihvamashyah
Yamritvijo vrijane manushasah prayasvanta ayavo jijananta

60.4

उ॒शिक् पा॑व॒को वसु॒र्मानु॑षेषु॒ वरे॑ण्यो॒ होता॑धायि वि॒क्षु ।
दमू॑ना गृ॒हप॑ति॒र्दम॒ आँ अ॒ग्निर्भु॑वद् रयि॒पती॑ रयी॒णाम् ॥४॥

Ushik pavako vasurmanusheshu varenyo hotadhayi vikshu
Damuna grihapatirdama am agnirbhuvad rayipati rayinam

60.5

तं त्वा॑ व॒यं पति॑मग्ने रयी॒णां प्र शं॑सामो म॒तिभि॒र्गोत॑मासः ।
आ॒शुं न वा॑जम्भ॒रं म॒र्जय॑न्तः प्रा॒तर्म॒क्षू धि॒याव॑सुर्जगम्यात् ॥५॥

Tam tva vayam patimagne rayinam pra shansamo matibhirgotamasah
Ashum na vajambharam marjayantah pratarmakshu dhiyavasurjagamyat