Sukta 59

59.1

7 nodha gautamah, agnirvaishvanarah, trishtup

व॒या इद॑ग्ने अ॒ग्नय॑स्ते अ॒न्ये त्वे विश्वे॑ अ॒मृता॑ मादयन्ते ।
वैश्वा॑नर॒ नाभि॑रसि क्षिती॒नां स्थूणे॑व॒ जनाँ॑ उप॒मिद् य॑यन्थ ॥१॥

Vaya idagne agnayaste anye tve vishve amrita madayante
Vaishvanara nabhirasi kshitinam sthuneva janam upamid yayantha

मू॒र्धा दि॒वो नाभि॑र॒ग्निः पृ॑थि॒व्या अथा॑भवदर॒ती रोद॑स्योः ।
तं त्वा॑ दे॒वासो॑ऽजनयन्त दे॒वं वैश्वा॑नर॒ ज्योति॒रिदार्या॑य ॥२॥

Murdha divo nabhiragnih prithivya athabhavadarati rodasyoh
Tam tva devasojanayanta devam vaishvanara jyotiridaryaya

आ सूर्ये॒ न र॒श्मयो॑ ध्रु॒वासो॑ वैश्वान॒रे द॑धिरे॒ऽग्ना वसू॑नि ।
या पर्व॑ते॒ष्वोष॑धीष्व॒प्सु या मानु॑षे॒ष्वसि॒ तस्य॒ राजा॑ ॥३॥

A surye na rashmayo dhruvaso vaishvanare dadhiregna vasuni
Ya parvateshvoshadhishvapsu ya manusheshvasi tasya raja

बृ॒ह॒ती इ॑व सू॒नवे॒ रोद॑सी॒ गिरो॒ होता॑ मनु॒ष्यो॒ ३ न दक्ष॑ः ।
स्व॑र्वते स॒त्यशु॑ष्माय पू॒र्वीर्वै॑श्वान॒राय॒ नृत॑माय य॒ह्वीः ॥४॥

Brihati iva sunave rodasi giro hota manushyo 3 na dakshah
Svarvate satyashushmaya purvirvaishvanaraya nritamaya yahvih

दि॒वश्चि॑त् ते बृह॒तो जा॑तवेदो॒ वैश्वा॑नर॒ प्र रि॑रिचे महि॒त्वम् ।
राजा॑ कृष्टी॒नाम॑सि॒ मानु॑षीणां यु॒धा दे॒वेभ्यो॒ वरि॑वश्चकर्थ ॥५॥

Divashchit te brihato jatavedo vaishvanara pra ririche mahitvam
Raja krishtinamasi manushinam yudha devebhyo varivashchakartha

प्र नू म॑हि॒त्वं वृ॑ष॒भस्य॑ वोचं॒ यं पू॒रवो॑ वृत्र॒हणं॒ सच॑न्ते ।
वै॒श्वा॒न॒रो दस्यु॑म॒ग्निर्ज॑घ॒न्वाँ अधू॑नो॒त् काष्ठा॒ अव॒ शम्ब॑रं भेत् ॥६॥

Pra nu mahitvam vrishabhasya vocham yam puravo vritrahanam sachante
Vaishvanaro dasyumagnirjaghanvam adhunot kashtha ava shambaram bhet

वै॒श्वा॒न॒रो म॑हि॒म्ना वि॒श्वकृ॑ष्टिर्भ॒रद्वा॑जेषु यज॒तो वि॒भावा॑ ।
शा॒त॒व॒ने॒ये श॒तिनी॑भिर॒ग्निः पु॑रुणी॒थे ज॑रते सू॒नृता॑वान् ॥७॥

Vaishvanaro mahimna vishvakrishtirbharadvajeshu yajato vibhava
Shatavaneye shatinibhiragnih purunithe jarate sunritavan