Sukta 171

171.1

6 agastyo maitravarunih, marutah, 3-6 marutvanindrah, trishtup

प्रति॑ व ए॒ना नम॑सा॒हमे॑मि सू॒क्तेन॑ भिक्षे सुम॒तिं तु॒राणा॑म् ।
र॒रा॒णता॑ मरुतो वे॒द्याभि॒र्नि हेळो॑ ध॒त्त वि मु॑चध्व॒मश्वा॑न् ॥१॥

Prati va ena namasahamemi suktena bhikshe sumatim turanam
Raranata maruto vedyabhirni helo dhatta vi muchadhvamashvan

ए॒ष व॒ः स्तोमो॑ मरुतो॒ नम॑स्वान् हृ॒दा त॒ष्टो मन॑सा धायि देवाः ।
उपे॒मा या॑त॒ मन॑सा जुषा॒णा यू॒यं हि ष्ठा नम॑स॒ इद् वृ॒धास॑ः ॥२॥

Esha vah stomo maruto namasvan hrida tashto manasa dhayi devah
Upema yata manasa jushana yuyam hi shtha namasa id vridhasah

स्तु॒तासो॑ नो म॒रुतो॑ मृळयन्तू॒त स्तु॒तो म॒घवा॒ शम्भ॑विष्ठः ।
ऊ॒र्ध्वा न॑ः सन्तु को॒म्या वना॒न्यहा॑नि॒ विश्वा॑ मरुतो जिगी॒षा ॥३॥

Stutaso no maruto mrilayantuta stuto maghava shambhavishthah
Urdhva nah santu komya vananyahani vishva maruto jigisha

अ॒स्माद॒हं त॑वि॒षादीष॑माण॒ इन्द्रा॑द् भि॒या म॑रुतो॒ रेज॑मानः ।
यु॒ष्मभ्यं॑ ह॒व्या निशि॑तान्यास॒न् तान्या॒रे च॑कृमा मृ॒ळता॑ नः ॥४॥

Asmadaham tavishadishamana indrad bhiya maruto rejamanah
Yushmabhyam havya nishitanyasan tanyare chakrima mrilata nah

येन॒ माना॑सश्चि॒तय॑न्त उ॒स्रा व्यु॑ष्टिषु॒ शव॑सा॒ शश्व॑तीनाम् ।
स नो॑ म॒रुद्भि॑र्वृषभ॒ श्रवो॑ धा उ॒ग्र उ॒ग्रेभि॒ः स्थवि॑रः सहो॒दाः ॥५॥

Yena manasashchitayanta usra vyushtishu shavasa shashvatinam
Sa no marudbhirvrishabha shravo dha ugra ugrebhih sthavirah sahodah

त्वं पा॑हीन्द्र॒ सही॑यसो॒ नॄन् भवा॑ म॒रुद्भि॒रव॑यातहेळाः ।
सु॒प्र॒के॒तेभि॑ः सास॒हिर्दधा॑नो वि॒द्यामे॒षं वृ॒जनं॑ जी॒रदा॑नुम् ॥६॥

Tvam pahindra sahiyaso nrin bhava marudbhiravayatahelah
Supraketebhih sasahirdadhano vidyamesham vrijanam jiradanum