Sukta 138

138.1

4 paruchchhepo daivodasih, pusha, atyashtih

प्रप्र॑ पू॒ष्णस्तु॑विजा॒तस्य॑ शस्यते महि॒त्वम॑स्य त॒वसो॒ न त॑न्दते स्तो॒त्रम॑स्य॒ न त॑न्दते ।
अर्चा॑मि सुम्न॒यन्न॒हमन्त्यू॑तिं मयो॒भुव॑म् ।
विश्व॑स्य॒ यो मन॑ आयुयु॒वे म॒खो दे॒व आ॑युयु॒वे म॒खः ॥१॥

Prapra pushnastuvijatasya shasyate mahitvamasya tavaso na tandate stotramasya na tandate
Archami sumnayannahamantyutim mayobhuvam
Vishvasya yo mana ayuyuve makho deva ayuyuve makhah

138.2

प्र हि त्वा॑ पूषन्नजि॒रं न याम॑नि॒ स्तोमे॑भिः कृ॒ण्व ऋ॒णवो॒ यथा॒ मृध॒ उष्ट्रो॒ न पी॑परो॒ मृध॑ः ।
हु॒वे यत् त्वा॑ मयो॒भुवं॑ दे॒वं स॒ख्याय॒ मर्त्य॑ः ।
अ॒स्माक॑माङ्गू॒षान् द्यु॒म्निन॑स्कृधि॒ वाजे॑षु द्यु॒म्निन॑स्कृधि ॥२॥

Pra hi tva pushannajiram na yamani stomebhih krinva rinavo yatha mridha ushtro na piparo mridhah
Huve yat tva mayobhuvam devam sakhyaya martyah
Asmakamangushan dyumninaskridhi vajeshu dyumninaskridhi

138.3

यस्य॑ ते पूषन् त्स॒ख्ये वि॑प॒न्यव॒ः क्रत्वा॑ चि॒त् सन्तोऽव॑सा बुभुज्रि॒र इति॒ क्रत्वा॑ बुभुज्रि॒रे ।
तामनु॑ त्वा॒ नवी॑यसीं नि॒युतं॑ रा॒य ई॑महे ।
अहे॑ळमान उरुशंस॒ सरी॑ भव॒ वाजे॑वाजे॒ सरी॑ भव ॥३॥

Yasya te pushan tsakhye vipanyavah kratva chit santovasa bubhujrira iti kratva bubhujrire
Tamanu tva naviyasim niyutam raya imahe
Ahelamana urushansa sari bhava vajevaje sari bhava

138.4

अ॒स्या ऊ॒ षु ण॒ उप॑ सा॒तये॑ भु॒वो ऽहे॑ळमानो ररि॒वाँ अ॑जाश्व श्रवस्य॒ताम॑जाश्व ।
ओ षु त्वा॑ ववृतीमहि॒ स्तोमे॑भिर्दस्म सा॒धुभि॑ः ।
न॒हि त्वा॑ पूषन्नति॒मन्य॑ आघृणे॒ न ते॑ स॒ख्यम॑पह्नु॒वे ॥४॥

Asya u shu na upa sataye bhuvo helamano rarivam ajashva shravasyatamajashva
O shu tva vavritimahi stomebhirdasma sadhubhih
Nahi tva pushannatimanya aghrine na te sakhyamapahnuve