UtshovDoha 6
6.1
Chaupai
आए भरत संग सब लोगा। कृस तन श्रीरघुबीर बियोगा।।
बामदेव बसिष्ठ मुनिनायक। देखे प्रभु महि धरि धनु सायक।।
धाइ धरे गुर चरन सरोरुह। अनुज सहित अति पुलक तनोरुह।।
भेंटि कुसल बूझी मुनिराया। हमरें कुसल तुम्हारिहिं दाया।।
सकल द्विजन्ह मिलि नायउ माथा। धर्म धुरंधर रघुकुलनाथा।।
गहे भरत पुनि प्रभु पद पंकज। नमत जिन्हहि सुर मुनि संकर अज।।
परे भूमि नहिं उठत उठाए। बर करि कृपासिंधु उर लाए।।
स्यामल गात रोम भए ठाढ़े। नव राजीव नयन जल बाढ़े।।
Ae bharat sang sab loga, kris tan shriraghubir biyoga
Bamadev basishtha muninayak, dekhe prabhu mahi dhari dhanu sayak
Dhai dhare gur charan saroruh, anuj sahit ati pulak tanoruh
Bhenti kusal bujhi muniraya, hamaren kusal tumharihin daya
Sakal dvijanha mili nayau matha, dharma dhurandhar raghukulanatha
Gahe bharat puni prabhu pad pankaj, namat jinhahi sur muni sankar aj
Pare bhumi nahin uthat uthae, bar kari kripasindhu ur lae
Syamal gat rom bhae tharhe, nav rajiv nayan jal barhe
6.2
Chhand
राजीव लोचन स्त्रवत जल तन ललित पुलकावलि बनी।
अति प्रेम हृदयँ लगाइ अनुजहि मिले प्रभु त्रिभुअन धनी।।
प्रभु मिलत अनुजहि सोह मो पहिं जाति नहिं उपमा कही।
जनु प्रेम अरु सिंगार तनु धरि मिले बर सुषमा लही ॥1॥
Rajiv lochan stravat jal tan lalit pulakavali bani
Ati prem hridayam lagai anujahi mile prabhu tribhuan dhani
Prabhu milat anujahi soh mo pahin jati nahin upama kahi
Janu prem aru singar tanu dhari mile bar sushama lahi
6.3
Chhand
बूझत कृपानिधि कुसल भरतहि बचन बेगि न आवई।
सुनु सिवा सो सुख बचन मन ते भिन्न जान जो पावई।।
अब कुसल कौसलनाथ आरत जानि जन दरसन दियो।
बूड़त बिरह बारीस कृपानिधान मोहि कर गहि लियो ॥2॥
Bujhat kripanidhi kusal bharatahi bachan begi na avai
Sunu siva so sukh bachan man te bhinna jan jo pavai
Ab kusal kausalanath arat jani jan darasan diyo
Burat birah baris kripanidhan mohi kar gahi liyo
6.4
Doha/soratha
पुनि प्रभु हरषि सत्रुहन भेंटे हृदयँ लगाइ।
लछिमन भरत मिले तब परम प्रेम दोउ भाइ ॥5॥
Puni prabhu harashi satruhan bhente hridayam lagai
Lachhiman bharat mile tab param prem dou bhai