UtshovDoha 3
3.1
Chaupai
देखत हनूमान अति हरषेउ। पुलक गात लोचन जल बरषेउ।।
मन महँ बहुत भाँति सुख मानी। बोलेउ श्रवन सुधा सम बानी।।
जासु बिरहँ सोचहु दिन राती। रटहु निरंतर गुन गन पाँती।।
रघुकुल तिलक सुजन सुखदाता। आयउ कुसल देव मुनि त्राता।।
रिपु रन जीति सुजस सुर गावत। सीता सहित अनुज प्रभु आवत।।
सुनत बचन बिसरे सब दूखा। तृषावंत जिमि पाइ पियूषा।।
को तुम्ह तात कहाँ ते आए। मोहि परम प्रिय बचन सुनाए।।
मारुत सुत मैं कपि हनुमाना। नामु मोर सुनु कृपानिधाना।।
दीनबंधु रघुपति कर किंकर। सुनत भरत भेंटेउ उठि सादर।।
मिलत प्रेम नहिं हृदयँ समाता। नयन स्त्रवत जल पुलकित गाता।।
कपि तव दरस सकल दुख बीते। मिले आजु मोहि राम पिरीते।।
बार बार बूझी कुसलाता। तो कहुँ देउँ काह सुनु भ्राता।।
एहि संदेस सरिस जग माहीं। करि बिचार देखेउँ कछु नाहीं।।
नाहिन तात उरिन मैं तोही। अब प्रभु चरित सुनावहु मोही।।
तब हनुमंत नाइ पद माथा। कहे सकल रघुपति गुन गाथा।।
कहु कपि कबहुँ कृपाल गोसाईं। सुमिरहिं मोहि दास की नाईं।।
Dekhat hanuman ati harasheu, pulak gat lochan jal barasheu
Man maham bahut bhanti sukh mani, boleu shravan sudha sam bani
Jasu biraham sochahu din rati, ratahu nirantar gun gan panti
Raghukul tilak sujan sukhadata, ayau kusal dev muni trata
Ripu ran jiti sujas sur gavat, sita sahit anuj prabhu avat
Sunat bachan bisare sab dukha, trishavant jimi pai piyusha
Ko tumha tat kahan te ae, mohi param priy bachan sunae
Marut sut main kapi hanumana, namu mor sunu kripanidhana
Dinabandhu raghupati kar kinkar, sunat bharat bhenteu uthi sadar
Milat prem nahin hridayam samata, nayan stravat jal pulakit gata
Kapi tav daras sakal dukh bite, mile aju mohi ram pirite
Bar bar bujhi kusalata, to kahun deum kah sunu bhrata
Ehi sandes saris jag mahin, kari bichar dekheum kachhu nahin
Nahin tat urin main tohi, ab prabhu charit sunavahu mohi
Tab hanumant nai pad matha, kahe sakal raghupati gun gatha
Kahu kapi kabahun kripal gosaim, sumirahin mohi das ki naim
3.2
Chhand
निज दास ज्यों रघुबंसभूषन कबहुँ मम सुमिरन कर् यो।
सुनि भरत बचन बिनीत अति कपि पुलकित तन चरनन्हि पर् यो।।
रघुबीर निज मुख जासु गुन गन कहत अग जग नाथ जो।
काहे न होइ बिनीत परम पुनीत सदगुन सिंधु सो।।
Nij das jyon raghubansabhushan kabahun mam sumiran kar yo
Suni bharat bachan binit ati kapi pulakit tan charananhi par yo
Raghubir nij mukh jasu gun gan kahat ag jag nath jo
Kahe na hoi binit param punit sadagun sindhu so
3.3
Doha/soratha
राम प्रान प्रिय नाथ तुम्ह सत्य बचन मम तात।
पुनि पुनि मिलत भरत सुनि हरष न हृदयँ समात ॥2(क)॥
Ram pran priy nath tumha satya bachan mam tat
Puni puni milat bharat suni harash na hridayam samat, 2(ka)
3.4
Doha/soratha
भरत चरन सिरु नाइ तुरित गयउ कपि राम पहिं।
कही कुसल सब जाइ हरषि चलेउ प्रभु जान चढ़ि ॥2(ख)॥
Bharat charan siru nai turit gayau kapi ram pahin
Kahi kusal sab jai harashi chaleu prabhu jan charhi, 2(kh)