UtshovDoha 29
29.1
Chaupai
सुमन बाटिका सबहिं लगाई। बिबिध भाँति करि जतन बनाई।।
लता ललित बहु जाति सुहाई। फूलहिं सदा बंसत कि नाई।।
गुंजत मधुकर मुखर मनोहर। मारुत त्रिबिध सदा बह सुंदर।।
नाना खग बालकन्हि जिआए। बोलत मधुर उड़ात सुहाए।।
मोर हंस सारस पारावत। भवननि पर सोभा अति पावत।।
जहँ तहँ देखहिं निज परिछाहीं। बहु बिधि कूजहिं नृत्य कराहीं।।
सुक सारिका पढ़ावहिं बालक। कहहु राम रघुपति जनपालक।।
राज दुआर सकल बिधि चारू। बीथीं चौहट रूचिर बजारू।।
Suman batika sabahin lagai, bibidh bhanti kari jatan banai
Lata lalit bahu jati suhai, phulahin sada bansat ki nai
Gunjat madhukar mukhar manohar, marut tribidh sada bah sundar
Nana khag balakanhi jiae, bolat madhur urat suhae
Mor hans saras paravat, bhavanani par sobha ati pavat
Jaham taham dekhahin nij parichhahin, bahu bidhi kujahin nritya karahin
Suk sarika parhavahin balak, kahahu ram raghupati janapalak
Raj duar sakal bidhi charu, bithin chauhat ruchir bajaru
29.2
Chhand
बाजार रुचिर न बनइ बरनत बस्तु बिनु गथ पाइए।
जहँ भूप रमानिवास तहँ की संपदा किमि गाइए।।
बैठे बजाज सराफ बनिक अनेक मनहुँ कुबेर ते।
सब सुखी सब सच्चरित सुंदर नारि नर सिसु जरठ जे।।
Bajar ruchir na banai baranat bastu binu gath paie
Jaham bhup ramanivas taham ki sampada kimi gaie
Baithe bajaj saraph banik anek manahun kuber te
Sab sukhi sab sachcharit sundar nari nar sisu jarath je
29.3
Doha/soratha
उत्तर दिसि सरजू बह निर्मल जल गंभीर।
बाँधे घाट मनोहर स्वल्प पंक नहिं तीर ॥28॥
Uttar disi saraju bah nirmal jal gambhir
Bandhe ghat manohar svalpa pank nahin tir