UtshovDoha 115
115.1
Chaupai
काल कर्म गुन दोष सुभाऊ। कछु दुख तुम्हहि न ब्यापिहि काऊ।।
राम रहस्य ललित बिधि नाना। गुप्त प्रगट इतिहास पुराना।।
बिनु श्रम तुम्ह जानब सब सोऊ। नित नव नेह राम पद होऊ।।
जो इच्छा करिहहु मन माहीं। हरि प्रसाद कछु दुर्लभ नाहीं।।
सुनि मुनि आसिष सुनु मतिधीरा। ब्रह्मगिरा भइ गगन गँभीरा।।
एवमस्तु तव बच मुनि ग्यानी। यह मम भगत कर्म मन बानी।।
सुनि नभगिरा हरष मोहि भयऊ। प्रेम मगन सब संसय गयऊ।।
करि बिनती मुनि आयसु पाई। पद सरोज पुनि पुनि सिरु नाई।।
हरष सहित एहिं आश्रम आयउँ। प्रभु प्रसाद दुर्लभ बर पायउँ।।
इहाँ बसत मोहि सुनु खग ईसा। बीते कलप सात अरु बीसा।।
करउँ सदा रघुपति गुन गाना। सादर सुनहिं बिहंग सुजाना।।
जब जब अवधपुरीं रघुबीरा। धरहिं भगत हित मनुज सरीरा।।
तब तब जाइ राम पुर रहऊँ। सिसुलीला बिलोकि सुख लहऊँ।।
पुनि उर राखि राम सिसुरूपा। निज आश्रम आवउँ खगभूपा।।
कथा सकल मैं तुम्हहि सुनाई। काग देह जेहिं कारन पाई।।
कहिउँ तात सब प्रस्न तुम्हारी। राम भगति महिमा अति भारी।।
Kal karma gun dosh subhau, kachhu dukh tumhahi na byapihi kau
Ram rahasya lalit bidhi nana, gupta pragat itihas purana
Binu shram tumha janab sab sou, nit nav neh ram pad hou
Jo ichchha karihahu man mahin, hari prasad kachhu durlabh nahin
Suni muni asish sunu matidhira, brahmagira bhai gagan gambhira
Evamastu tav bach muni gyani, yah mam bhagat karma man bani
Suni nabhagira harash mohi bhayau, prem magan sab sansay gayau
Kari binati muni ayasu pai, pad saroj puni puni siru nai
Harash sahit ehin ashram ayaum, prabhu prasad durlabh bar payaum
Ihan basat mohi sunu khag isa, bite kalap sat aru bisa
Karaum sada raghupati gun gana, sadar sunahin bihang sujana
Jab jab avadhapurin raghubira, dharahin bhagat hit manuj sarira
Tab tab jai ram pur rahaum, sisulila biloki sukh lahaum
Puni ur rakhi ram sisurupa, nij ashram avaum khagabhupa
Katha sakal main tumhahi sunai, kag deh jehin karan pai
Kahium tat sab prasna tumhari, ram bhagati mahima ati bhari
115.2
Doha/soratha
ताते यह तन मोहि प्रिय भयउ राम पद नेह।
निज प्रभु दरसन पायउँ गए सकल संदेह ॥114(क)॥
Tate yah tan mohi priy bhayau ram pad neh
Nij prabhu darasan payaum gae sakal sandeh, 114(ka)
115.3
Doha/soratha
भगति पच्छ हठ करि रहेउँ दीन्हि महारिषि साप।
मुनि दुर्लभ बर पायउँ देखहु भजन प्रताप ॥114(ख)॥
Bhagati pachchha hath kari raheum dinhi maharishi sap
Muni durlabh bar payaum dekhahu bhajan pratap, 114(kh)