UtshovDoha 113
113.1
Chaupai
कबहुँ कि दुख सब कर हित ताकें। तेहि कि दरिद्र परस मनि जाकें।।
परद्रोही की होहिं निसंका। कामी पुनि कि रहहिं अकलंका।।
बंस कि रह द्विज अनहित कीन्हें। कर्म कि होहिं स्वरूपहि चीन्हें।।
काहू सुमति कि खल सँग जामी। सुभ गति पाव कि परत्रिय गामी।।
भव कि परहिं परमात्मा बिंदक। सुखी कि होहिं कबहुँ हरिनिंदक।।
राजु कि रहइ नीति बिनु जानें। अघ कि रहहिं हरिचरित बखानें।।
पावन जस कि पुन्य बिनु होई। बिनु अघ अजस कि पावइ कोई।।
लाभु कि किछु हरि भगति समाना। जेहि गावहिं श्रुति संत पुराना।।
हानि कि जग एहि सम किछु भाई। भजिअ न रामहि नर तनु पाई।।
अघ कि पिसुनता सम कछु आना। धर्म कि दया सरिस हरिजाना।।
एहि बिधि अमिति जुगुति मन गुनऊँ। मुनि उपदेस न सादर सुनऊँ।।
पुनि पुनि सगुन पच्छ मैं रोपा। तब मुनि बोलेउ बचन सकोपा।।
मूढ़ परम सिख देउँ न मानसि। उत्तर प्रतिउत्तर बहु आनसि।।
सत्य बचन बिस्वास न करही। बायस इव सबही ते डरही।।
सठ स्वपच्छ तब हृदयँ बिसाला। सपदि होहि पच्छी चंडाला।।
लीन्ह श्राप मैं सीस चढ़ाई। नहिं कछु भय न दीनता आई।।
Kabahun ki dukh sab kar hit taken, tehi ki daridra paras mani jaken
Paradrohi ki hohin nisanka, kami puni ki rahahin akalanka
Bans ki rah dvij anahit kinhen, karma ki hohin svarupahi chinhen
Kahu sumati ki khal sang jami, subh gati pav ki paratriy gami
Bhav ki parahin paramatma bindak, sukhi ki hohin kabahun harinindak
Raju ki rahai niti binu janen, agh ki rahahin haricharit bakhanen
Pavan jas ki punya binu hoi, binu agh ajas ki pavai koi
Labhu ki kichhu hari bhagati samana, jehi gavahin shruti sant purana
Hani ki jag ehi sam kichhu bhai, bhajia na ramahi nar tanu pai
Agh ki pisunata sam kachhu ana, dharma ki daya saris harijana
Ehi bidhi amiti juguti man gunaum, muni upades na sadar sunaum
Puni puni sagun pachchha main ropa, tab muni boleu bachan sakopa
Murh param sikh deum na manasi, uttar pratiuttar bahu anasi
Satya bachan bisvas na karahi, bayas iv sabahi te darahi
Sath svapachchha tab hridayam bisala, sapadi hohi pachchhi chandala
Linha shrap main sis charhai, nahin kachhu bhay na dinata ai
113.2
Doha/soratha
तुरत भयउँ मैं काग तब पुनि मुनि पद सिरु नाइ।
सुमिरि राम रघुबंस मनि हरषित चलेउँ उड़ाइ ॥112(क)॥
Turat bhayaum main kag tab puni muni pad siru nai
Sumiri ram raghubans mani harashit chaleum urai, 112(ka)
113.3
Doha/soratha
उमा जे राम चरन रत बिगत काम मद क्रोध।।
निज प्रभुमय देखहिं जगत केहि सन करहिं बिरोध ॥112(ख)॥
Uma je ram charan rat bigat kam mad krodh
Nij prabhumay dekhahin jagat kehi san karahin birodh, 112(kh)