UtshovDoha 94
94.1
Chaupai
दसमुख देखि सिरन्ह कै बाढ़ी। बिसरा मरन भई रिस गाढ़ी।।
गर्जेउ मूढ़ महा अभिमानी। धायउ दसहु सरासन तानी।।
समर भूमि दसकंधर कोप्यो। बरषि बान रघुपति रथ तोप्यो।।
दंड एक रथ देखि न परेऊ। जनु निहार महुँ दिनकर दुरेऊ।।
हाहाकार सुरन्ह जब कीन्हा। तब प्रभु कोपि कारमुक लीन्हा।।
सर निवारि रिपु के सिर काटे। ते दिसि बिदिस गगन महि पाटे।।
काटे सिर नभ मारग धावहिं। जय जय धुनि करि भय उपजावहिं।।
कहँ लछिमन सुग्रीव कपीसा। कहँ रघुबीर कोसलाधीसा।।
Dasamukh dekhi siranha kai barhi, bisara maran bhai ris garhi
Garjeu murh maha abhimani, dhayau dasahu sarasan tani
Samar bhumi dasakandhar kopyo, barashi ban raghupati rath topyo
Dand ek rath dekhi na pareu, janu nihar mahun dinakar dureu
Hahakar suranha jab kinha, tab prabhu kopi karamuk linha
Sar nivari ripu ke sir kate, te disi bidis gagan mahi pate
Kate sir nabh marag dhavahin, jay jay dhuni kari bhay upajavahin
Kaham lachhiman sugriv kapisa, kaham raghubir kosaladhisa
94.2
Chhand
कहँ रामु कहि सिर निकर धाए देखि मर्कट भजि चले।
संधानि धनु रघुबंसमनि हँसि सरन्हि सिर बेधे भले।।
सिर मालिका कर कालिका गहि बृंद बृंदन्हि बहु मिलीं।
करि रुधिर सरि मज्जनु मनहुँ संग्राम बट पूजन चलीं।।
Kaham ramu kahi sir nikar dhae dekhi markat bhaji chale
Sandhani dhanu raghubansamani hansi saranhi sir bedhe bhale
Sir malika kar kalika gahi brind brindanhi bahu milin
Kari rudhir sari majjanu manahun sangram bat pujan chalin
94.3
Doha/soratha
पुनि दसकंठ क्रुद्ध होइ छाँड़ी सक्ति प्रचंड।
चली बिभीषन सन्मुख मनहुँ काल कर दंड ॥93॥
Puni dasakanth kruddha hoi chhanri sakti prachand
Chali bibhishan sanmukh manahun kal kar dand