UtshovDoha 93
93.1
Chaupai
चले बान सपच्छ जनु उरगा। प्रथमहिं हतेउ सारथी तुरगा।।
रथ बिभंजि हति केतु पताका। गर्जा अति अंतर बल थाका।।
तुरत आन रथ चढ़ि खिसिआना। अस्त्र सस्त्र छाँड़ेसि बिधि नाना।।
बिफल होहिं सब उद्यम ताके। जिमि परद्रोह निरत मनसा के।।
तब रावन दस सूल चलावा। बाजि चारि महि मारि गिरावा।।
तुरग उठाइ कोपि रघुनायक। खैंचि सरासन छाँड़े सायक।।
रावन सिर सरोज बनचारी। चलि रघुबीर सिलीमुख धारी।।
दस दस बान भाल दस मारे। निसरि गए चले रुधिर पनारे।।
स्त्रवत रुधिर धायउ बलवाना। प्रभु पुनि कृत धनु सर संधाना।।
तीस तीर रघुबीर पबारे। भुजन्हि समेत सीस महि पारे।।
काटतहीं पुनि भए नबीने। राम बहोरि भुजा सिर छीने।।
प्रभु बहु बार बाहु सिर हए। कटत झटिति पुनि नूतन भए।।
पुनि पुनि प्रभु काटत भुज सीसा। अति कौतुकी कोसलाधीसा।।
रहे छाइ नभ सिर अरु बाहू। मानहुँ अमित केतु अरु राहू।।
Chale ban sapachchha janu uraga, prathamahin hateu sarathi turaga
Rath bibhanji hati ketu pataka, garja ati antar bal thaka
Turat an rath charhi khisiana, astra sastra chhanresi bidhi nana
Biphal hohin sab udyam take, jimi paradroh nirat manasa ke
Tab ravan das sul chalava, baji chari mahi mari girava
Turag uthai kopi raghunayak, khainchi sarasan chhanre sayak
Ravan sir saroj banachari, chali raghubir silimukh dhari
Das das ban bhal das mare, nisari gae chale rudhir panare
Stravat rudhir dhayau balavana, prabhu puni krit dhanu sar sandhana
Tis tir raghubir pabare, bhujanhi samet sis mahi pare
Katatahin puni bhae nabine, ram bahori bhuja sir chhine
Prabhu bahu bar bahu sir hae, katat jhatiti puni nutan bhae
Puni puni prabhu katat bhuj sisa, ati kautuki kosaladhisa
Rahe chhai nabh sir aru bahu, manahun amit ketu aru rahu
93.2
Chhand
जनु राहु केतु अनेक नभ पथ स्त्रवत सोनित धावहीं।
रघुबीर तीर प्रचंड लागहिं भूमि गिरन न पावहीं।।
एक एक सर सिर निकर छेदे नभ उड़त इमि सोहहीं।
जनु कोपि दिनकर कर निकर जहँ तहँ बिधुंतुद पोहहीं।।
Janu rahu ketu anek nabh path stravat sonit dhavahin
Raghubir tir prachand lagahin bhumi giran na pavahin
Ek ek sar sir nikar chhede nabh urat imi sohahin
Janu kopi dinakar kar nikar jaham taham bidhuntud pohahin
93.3
Doha/soratha
जिमि जिमि प्रभु हर तासु सिर तिमि तिमि होहिं अपार।
सेवत बिषय बिबर्ध जिमि नित नित नूतन मार ॥92॥
Jimi jimi prabhu har tasu sir timi timi hohin apar
Sevat bishay bibardha jimi nit nit nutan mar