UtshovDoha 87
87.1
Chaupai
चलत होहिं अति असुभ भयंकर। बैठहिं गीध उड़ाइ सिरन्ह पर।।
भयउ कालबस काहु न माना। कहेसि बजावहु जुद्ध निसाना।।
चली तमीचर अनी अपारा। बहु गज रथ पदाति असवारा।।
प्रभु सन्मुख धाए खल कैंसें। सलभ समूह अनल कहँ जैंसें।।
इहाँ देवतन्ह अस्तुति कीन्ही। दारुन बिपति हमहि एहिं दीन्ही।।
अब जनि राम खेलावहु एही। अतिसय दुखित होति बैदेही।।
देव बचन सुनि प्रभु मुसकाना। उठि रघुबीर सुधारे बाना।
जटा जूट दृढ़ बाँधै माथे। सोहहिं सुमन बीच बिच गाथे।।
अरुन नयन बारिद तनु स्यामा। अखिल लोक लोचनाभिरामा।।
कटितट परिकर कस्यो निषंगा। कर कोदंड कठिन सारंगा।।
Chalat hohin ati asubh bhayankar, baithahin gidh urai siranha par
Bhayau kalabas kahu na mana, kahesi bajavahu juddha nisana
Chali tamichar ani apara, bahu gaj rath padati asavara
Prabhu sanmukh dhae khal kainsen, salabh samuh anal kaham jainsen
Ihan devatanha astuti kinhi, darun bipati hamahi ehin dinhi
Ab jani ram khelavahu ehi, atisay dukhit hoti baidehi
Dev bachan suni prabhu musakana, uthi raghubir sudhare bana
Jata jut drirh bandhai mathe, sohahin suman bich bich gathe
Arun nayan barid tanu syama, akhil lok lochanabhirama
Katitat parikar kasyo nishanga, kar kodand kathin saranga
87.2
Chhand
सारंग कर सुंदर निषंग सिलीमुखाकर कटि कस्यो।
भुजदंड पीन मनोहरायत उर धरासुर पद लस्यो।।
कह दास तुलसी जबहिं प्रभु सर चाप कर फेरन लगे।
ब्रह्मांड दिग्गज कमठ अहि महि सिंधु भूधर डगमगे।।
Sarang kar sundar nishang silimukhakar kati kasyo
Bhujadand pin manoharayat ur dharasur pad lasyo
Kah das tulasi jabahin prabhu sar chap kar pheran lage
Brahmand diggaj kamath ahi mahi sindhu bhudhar dagamage
87.3
Doha/soratha
सोभा देखि हरषि सुर बरषहिं सुमन अपार।
जय जय जय करुनानिधि छबि बल गुन आगार ॥86॥
Sobha dekhi harashi sur barashahin suman apar
Jay jay jay karunanidhi chhabi bal gun agar