UtshovDoha 83
83.1
Chaupai
धायउ परम क्रुद्ध दसकंधर। सन्मुख चले हूह दै बंदर।।
गहि कर पादप उपल पहारा। डारेन्हि ता पर एकहिं बारा।।
लागहिं सैल बज्र तन तासू। खंड खंड होइ फूटहिं आसू।।
चला न अचल रहा रथ रोपी। रन दुर्मद रावन अति कोपी।।
इत उत झपटि दपटि कपि जोधा। मर्दै लाग भयउ अति क्रोधा।।
चले पराइ भालु कपि नाना। त्राहि त्राहि अंगद हनुमाना।।
पाहि पाहि रघुबीर गोसाई। यह खल खाइ काल की नाई।।
तेहि देखे कपि सकल पराने। दसहुँ चाप सायक संधाने।।
Dhayau param kruddha dasakandhar, sanmukh chale huh dai bandar
Gahi kar padap upal pahara, darenhi ta par ekahin bara
Lagahin sail bajra tan tasu, khand khand hoi phutahin asu
Chala na achal raha rath ropi, ran durmad ravan ati kopi
It ut jhapati dapati kapi jodha, mardai lag bhayau ati krodha
Chale parai bhalu kapi nana, trahi trahi angad hanumana
Pahi pahi raghubir gosai, yah khal khai kal ki nai
Tehi dekhe kapi sakal parane, dasahun chap sayak sandhane
83.2
Chhand
संधानि धनु सर निकर छाड़ेसि उरग जिमि उड़ि लागहीं।
रहे पूरि सर धरनी गगन दिसि बिदसि कहँ कपि भागहीं।।
भयो अति कोलाहल बिकल कपि दल भालु बोलहिं आतुरे।
रघुबीर करुना सिंधु आरत बंधु जन रच्छक हरे।।
Sandhani dhanu sar nikar chharesi urag jimi uri lagahin
Rahe puri sar dharani gagan disi bidasi kaham kapi bhagahin
Bhayo ati kolahal bikal kapi dal bhalu bolahin ature
Raghubir karuna sindhu arat bandhu jan rachchhak hare
83.3
Doha/soratha
निज दल बिकल देखि कटि कसि निषंग धनु हाथ।
लछिमन चले क्रुद्ध होइ नाइ राम पद माथ ॥82॥
Nij dal bikal dekhi kati kasi nishang dhanu hath
Lachhiman chale kruddha hoi nai ram pad math