UtshovDoha 82
82.1
Chaupai
सुर ब्रह्मादि सिद्ध मुनि नाना। देखत रन नभ चढ़े बिमाना।।
हमहू उमा रहे तेहि संगा। देखत राम चरित रन रंगा।।
सुभट समर रस दुहु दिसि माते। कपि जयसील राम बल ताते।।
एक एक सन भिरहिं पचारहिं। एकन्ह एक मर्दि महि पारहिं।।
मारहिं काटहिं धरहिं पछारहिं। सीस तोरि सीसन्ह सन मारहिं।।
उदर बिदारहिं भुजा उपारहिं। गहि पद अवनि पटकि भट डारहिं।।
निसिचर भट महि गाड़हि भालू। ऊपर ढारि देहिं बहु बालू।।
बीर बलिमुख जुद्ध बिरुद्धे। देखिअत बिपुल काल जनु क्रुद्धे।।
Sur brahmadi siddha muni nana, dekhat ran nabh charhe bimana
Hamahu uma rahe tehi sanga, dekhat ram charit ran ranga
Subhat samar ras duhu disi mate, kapi jayasil ram bal tate
Ek ek san bhirahin pacharahin, ekanha ek mardi mahi parahin
Marahin katahin dharahin pachharahin, sis tori sisanha san marahin
Udar bidarahin bhuja uparahin, gahi pad avani pataki bhat darahin
Nisichar bhat mahi garahi bhalu, upar dhari dehin bahu balu
Bir balimukh juddha biruddhe, dekhiat bipul kal janu kruddhe
82.2
Chhand
क्रुद्धे कृतांत समान कपि तन स्त्रवत सोनित राजहीं।
मर्दहिं निसाचर कटक भट बलवंत घन जिमि गाजहीं।।
मारहिं चपेटन्हि डाटि दातन्ह काटि लातन्ह मीजहीं।
चिक्करहिं मर्कट भालु छल बल करहिं जेहिं खल छीजहीं।।
धरि गाल फारहिं उर बिदारहिं गल अँतावरि मेलहीं।
प्रहलादपति जनु बिबिध तनु धरि समर अंगन खेलहीं।।
धरु मारु काटु पछारु घोर गिरा गगन महि भरि रही।
जय राम जो तृन ते कुलिस कर कुलिस ते कर तृन सही।।
Kruddhe kritant saman kapi tan stravat sonit rajahin
Mardahin nisachar katak bhat balavant ghan jimi gajahin
Marahin chapetanhi dati datanha kati latanha mijahin
Chikkarahin markat bhalu chhal bal karahin jehin khal chhijahin
Dhari gal pharahin ur bidarahin gal antavari melahin
Prahaladapati janu bibidh tanu dhari samar angan khelahin
Dharu maru katu pachharu ghor gira gagan mahi bhari rahi
Jay ram jo trin te kulis kar kulis te kar trin sahi
82.3
Doha/soratha
निज दल बिचलत देखेसि बीस भुजाँ दस चाप।
रथ चढ़ि चलेउ दसानन फिरहु फिरहु करि दाप ॥81॥
Nij dal bichalat dekhesi bis bhujan das chap
Rath charhi chaleu dasanan phirahu phirahu kari dap