UtshovDoha 73
73.1
Chaupai
दिन कें अंत फिरीं दोउ अनी। समर भई सुभटन्ह श्रम घनी।।
राम कृपाँ कपि दल बल बाढ़ा। जिमि तृन पाइ लाग अति डाढ़ा।।
छीजहिं निसिचर दिनु अरु राती। निज मुख कहें सुकृत जेहि भाँती।।
बहु बिलाप दसकंधर करई। बंधु सीस पुनि पुनि उर धरई।।
रोवहिं नारि हृदय हति पानी। तासु तेज बल बिपुल बखानी।।
मेघनाद तेहि अवसर आयउ। कहि बहु कथा पिता समुझायउ।।
देखेहु कालि मोरि मनुसाई। अबहिं बहुत का करौं बड़ाई।।
इष्टदेव सैं बल रथ पायउँ। सो बल तात न तोहि देखायउँ।।
एहि बिधि जल्पत भयउ बिहाना। चहुँ दुआर लागे कपि नाना।।
इत कपि भालु काल सम बीरा। उत रजनीचर अति रनधीरा।।
लरहिं सुभट निज निज जय हेतू। बरनि न जाइ समर खगकेतू।।
Din ken ant phirin dou ani, samar bhai subhatanha shram ghani
Ram kripan kapi dal bal barha, jimi trin pai lag ati darha
Chhijahin nisichar dinu aru rati, nij mukh kahen sukrit jehi bhanti
Bahu bilap dasakandhar karai, bandhu sis puni puni ur dharai
Rovahin nari hriday hati pani, tasu tej bal bipul bakhani
Meghanad tehi avasar ayau, kahi bahu katha pita samujhayau
Dekhehu kali mori manusai, abahin bahut ka karaun barai
Ishtadev sain bal rath payaum, so bal tat na tohi dekhayaum
Ehi bidhi jalpat bhayau bihana, chahun duar lage kapi nana
It kapi bhalu kal sam bira, ut rajanichar ati ranadhira
Larahin subhat nij nij jay hetu, barani na jai samar khagaketu
73.2
Doha/soratha
मेघनाद मायामय रथ चढ़ि गयउ अकास।।
गर्जेउ अट्टहास करि भइ कपि कटकहि त्रास ॥72॥
Meghanad mayamay rath charhi gayau akas
Garjeu attahas kari bhai kapi katakahi tras