UtshovDoha 13
13.1
Chaupai
पूरब दिसि गिरिगुहा निवासी। परम प्रताप तेज बल रासी।।
मत्त नाग तम कुंभ बिदारी। ससि केसरी गगन बन चारी।।
बिथुरे नभ मुकुताहल तारा। निसि सुंदरी केर सिंगारा।।
कह प्रभु ससि महुँ मेचकताई। कहहु काह निज निज मति भाई।।
कह सुग़ीव सुनहु रघुराई। ससि महुँ प्रगट भूमि कै झाँई।।
मारेउ राहु ससिहि कह कोई। उर महँ परी स्यामता सोई।।
कोउ कह जब बिधि रति मुख कीन्हा। सार भाग ससि कर हरि लीन्हा।।
छिद्र सो प्रगट इंदु उर माहीं। तेहि मग देखिअ नभ परिछाहीं।।
प्रभु कह गरल बंधु ससि केरा। अति प्रिय निज उर दीन्ह बसेरा।।
बिष संजुत कर निकर पसारी। जारत बिरहवंत नर नारी।।
Purab disi giriguha nivasi, param pratap tej bal rasi
Matta nag tam kumbh bidari, sasi kesari gagan ban chari
Bithure nabh mukutahal tara, nisi sundari ker singara
Kah prabhu sasi mahun mechakatai, kahahu kah nij nij mati bhai
Kah sugiv sunahu raghurai, sasi mahun pragat bhumi kai jhani
Mareu rahu sasihi kah koi, ur maham pari syamata soi
Kou kah jab bidhi rati mukh kinha, sar bhag sasi kar hari linha
Chhidra so pragat indu ur mahin, tehi mag dekhia nabh parichhahin
Prabhu kah garal bandhu sasi kera, ati priy nij ur dinha basera
Bish sanjut kar nikar pasari, jarat birahavant nar nari
13.2
Doha/soratha
कह हनुमंत सुनहु प्रभु ससि तुम्हारा प्रिय दास।
तव मूरति बिधु उर बसति सोइ स्यामता अभास ॥12(क)॥
Kah hanumant sunahu prabhu sasi tumhara priy das
Tav murati bidhu ur basati soi syamata abhas, 12(ka)
13.3
Doha/soratha
पवन तनय के बचन सुनि बिहँसे रामु सुजान।
दच्छिन दिसि अवलोकि प्रभु बोले कृपा निधान ॥12(ख)॥
Pavan tanay ke bachan suni bihanse ramu sujan
Dachchhin disi avaloki prabhu bole kripa nidhan, 12(kh)