UtshovDoha 18
18.1
Chaupai
भगति जोग सुनि अति सुख पावा। लछिमन प्रभु चरनन्हि सिरु नावा।।
एहि बिधि गए कछुक दिन बीती। कहत बिराग ग्यान गुन नीती।।
सूपनखा रावन कै बहिनी। दुष्ट हृदय दारुन जस अहिनी।।
पंचबटी सो गइ एक बारा। देखि बिकल भइ जुगल कुमारा।।
भ्राता पिता पुत्र उरगारी। पुरुष मनोहर निरखत नारी।।
होइ बिकल सक मनहि न रोकी। जिमि रबिमनि द्रव रबिहि बिलोकी।।
रुचिर रुप धरि प्रभु पहिं जाई। बोली बचन बहुत मुसुकाई।।
तुम्ह सम पुरुष न मो सम नारी। यह सँजोग बिधि रचा बिचारी।।
मम अनुरूप पुरुष जग माहीं। देखेउँ खोजि लोक तिहु नाहीं।।
ताते अब लगि रहिउँ कुमारी। मनु माना कछु तुम्हहि निहारी।।
सीतहि चितइ कही प्रभु बाता। अहइ कुआर मोर लघु भ्राता।।
गइ लछिमन रिपु भगिनी जानी। प्रभु बिलोकि बोले मृदु बानी।।
सुंदरि सुनु मैं उन्ह कर दासा। पराधीन नहिं तोर सुपासा।।
प्रभु समर्थ कोसलपुर राजा। जो कछु करहिं उनहि सब छाजा।।
सेवक सुख चह मान भिखारी। ब्यसनी धन सुभ गति बिभिचारी।।
लोभी जसु चह चार गुमानी। नभ दुहि दूध चहत ए प्रानी।।
पुनि फिरि राम निकट सो आई। प्रभु लछिमन पहिं बहुरि पठाई।।
लछिमन कहा तोहि सो बरई। जो तृन तोरि लाज परिहरई।।
तब खिसिआनि राम पहिं गई। रूप भयंकर प्रगटत भई।।
सीतहि सभय देखि रघुराई। कहा अनुज सन सयन बुझाई।।
Bhagati jog suni ati sukh pava, lachhiman prabhu charananhi siru nava
Ehi bidhi gae kachhuk din biti, kahat birag gyan gun niti
Supanakha ravan kai bahini, dushta hriday darun jas ahini
Panchabati so gai ek bara, dekhi bikal bhai jugal kumara
Bhrata pita putra uragari, purush manohar nirakhat nari
Hoi bikal sak manahi na roki, jimi rabimani drav rabihi biloki
Ruchir rup dhari prabhu pahin jai, boli bachan bahut musukai
Tumha sam purush na mo sam nari, yah sanjog bidhi racha bichari
Mam anurup purush jag mahin, dekheum khoji lok tihu nahin
Tate ab lagi rahium kumari, manu mana kachhu tumhahi nihari
Sitahi chitai kahi prabhu bata, ahai kuar mor laghu bhrata
Gai lachhiman ripu bhagini jani, prabhu biloki bole mridu bani
Sundari sunu main unha kar dasa, paradhin nahin tor supasa
Prabhu samartha kosalapur raja, jo kachhu karahin unahi sab chhaja
Sevak sukh chah man bhikhari, byasani dhan subh gati bibhichari
Lobhi jasu chah char gumani, nabh duhi dudh chahat e prani
Puni phiri ram nikat so ai, prabhu lachhiman pahin bahuri pathai
Lachhiman kaha tohi so barai, jo trin tori laj pariharai
Tab khisiani ram pahin gai, rup bhayankar pragatat bhai
Sitahi sabhay dekhi raghurai, kaha anuj san sayan bujhai
18.2
Doha/soratha
लछिमन अति लाघवँ सो नाक कान बिनु कीन्हि।
ताके कर रावन कहँ मनौ चुनौती दीन्हि ॥17॥
Lachhiman ati laghavam so nak kan binu kinhi
Take kar ravan kaham manau chunauti dinhi