UtshovDoha 99
99.1
Chaupai
तब नारद सबहि समुझावा। पूरुब कथाप्रसंगु सुनावा।।
मयना सत्य सुनहु मम बानी। जगदंबा तव सुता भवानी।।
अजा अनादि सक्ति अबिनासिनि। सदा संभु अरधंग निवासिनि।।
जग संभव पालन लय कारिनि। निज इच्छा लीला बपु धारिनि।।
जनमीं प्रथम दच्छ गृह जाई। नामु सती सुंदर तनु पाई।।
तहँहुँ सती संकरहि बिबाहीं। कथा प्रसिद्ध सकल जग माहीं।।
एक बार आवत सिव संगा। देखेउ रघुकुल कमल पतंगा।।
भयउ मोहु सिव कहा न कीन्हा। भ्रम बस बेषु सीय कर लीन्हा।।
Tab narad sabahi samujhava, purub kathaprasangu sunava
Mayana satya sunahu mam bani, jagadamba tav suta bhavani
Aja anadi sakti abinasini, sada sambhu aradhang nivasini
Jag sambhav palan lay karini, nij ichchha lila bapu dharini
Janamin pratham dachchha grih jai, namu sati sundar tanu pai
Tahanhun sati sankarahi bibahin, katha prasiddha sakal jag mahin
Ek bar avat siv sanga, dekheu raghukul kamal patanga
Bhayau mohu siv kaha na kinha, bhram bas beshu siy kar linha
99.2
Chhand
सिय बेषु सती जो कीन्ह तेहि अपराध संकर परिहरीं।
हर बिरहँ जाइ बहोरि पितु कें जग्य जोगानल जरीं।।
अब जनमि तुम्हरे भवन निज पति लागि दारुन तपु किया।
अस जानि संसय तजहु गिरिजा सर्बदा संकर प्रिया।।
Siy beshu sati jo kinha tehi aparadh sankar pariharin
Har biraham jai bahori pitu ken jagya joganal jarin
Ab janami tumhare bhavan nij pati lagi darun tapu kiya
As jani sansay tajahu girija sarbada sankar priya
99.3
Doha/soratha
सुनि नारद के बचन तब सब कर मिटा बिषाद।
छन महुँ ब्यापेउ सकल पुर घर घर यह संबाद ॥98॥
Suni narad ke bachan tab sab kar mita bishad
Chhan mahun byapeu sakal pur ghar ghar yah sambad