UtshovDoha 97
97.1
Chaupai
लै अगवान बरातहि आए। दिए सबहि जनवास सुहाए।।
मैनाँ सुभ आरती सँवारी। संग सुमंगल गावहिं नारी।।
कंचन थार सोह बर पानी। परिछन चली हरहि हरषानी।।
बिकट बेष रुद्रहि जब देखा। अबलन्ह उर भय भयउ बिसेषा।।
भागि भवन पैठीं अति त्रासा। गए महेसु जहाँ जनवासा।।
मैना हृदयँ भयउ दुखु भारी। लीन्ही बोलि गिरीसकुमारी।।
अधिक सनेहँ गोद बैठारी। स्याम सरोज नयन भरे बारी।।
जेहिं बिधि तुम्हहि रूपु अस दीन्हा। तेहिं जड़ बरु बाउर कस कीन्हा।।
Lai agavan baratahi ae, die sabahi janavas suhae
Mainan subh arati sanvari, sang sumangal gavahin nari
Kanchan thar soh bar pani, parichhan chali harahi harashani
Bikat besh rudrahi jab dekha, abalanha ur bhay bhayau bisesha
Bhagi bhavan paithin ati trasa, gae mahesu jahan janavasa
Maina hridayam bhayau dukhu bhari, linhi boli girisakumari
Adhik saneham god baithari, syam saroj nayan bhare bari
Jehin bidhi tumhahi rupu as dinha, tehin jar baru baur kas kinha
97.2
Chhand
कस कीन्ह बरु बौराह बिधि जेहिं तुम्हहि सुंदरता दई।
जो फलु चहिअ सुरतरुहिं सो बरबस बबूरहिं लागई।।
तुम्ह सहित गिरि तें गिरौं पावक जरौं जलनिधि महुँ परौं।।
घरु जाउ अपजसु होउ जग जीवत बिबाहु न हौं करौं।।
Kas kinha baru baurah bidhi jehin tumhahi sundarata dai
Jo phalu chahia surataruhin so barabas baburahin lagai
Tumha sahit giri ten giraun pavak jaraun jalanidhi mahun paraun
Gharu jau apajasu hou jag jivat bibahu na haun karaun
97.3
Doha/soratha
भई बिकल अबला सकल दुखित देखि गिरिनारि।
करि बिलापु रोदति बदति सुता सनेहु सँभारि ॥96॥
Bhai bikal abala sakal dukhit dekhi girinari
Kari bilapu rodati badati suta sanehu sambhari