UtshovDoha 94
94.1
Chaupai
बर अनुहारि बरात न भाई। हँसी करैहहु पर पुर जाई।।
बिष्नु बचन सुनि सुर मुसकाने। निज निज सेन सहित बिलगाने।।
मनहीं मन महेसु मुसुकाहीं। हरि के बिंग्य बचन नहिं जाहीं।।
अति प्रिय बचन सुनत प्रिय केरे। भृंगिहि प्रेरि सकल गन टेरे।।
सिव अनुसासन सुनि सब आए। प्रभु पद जलज सीस तिन्ह नाए।।
नाना बाहन नाना बेषा। बिहसे सिव समाज निज देखा।।
कोउ मुखहीन बिपुल मुख काहू। बिनु पद कर कोउ बहु पद बाहू।।
बिपुल नयन कोउ नयन बिहीना। रिष्टपुष्ट कोउ अति तनखीना।।
Bar anuhari barat na bhai, hansi karaihahu par pur jai
Bishnu bachan suni sur musakane, nij nij sen sahit bilagane
Manahin man mahesu musukahin, hari ke bingya bachan nahin jahin
Ati priy bachan sunat priy kere, bhringihi preri sakal gan tere
Siv anusasan suni sab ae, prabhu pad jalaj sis tinha nae
Nana bahan nana besha, bihase siv samaj nij dekha
Kou mukhahin bipul mukh kahu, binu pad kar kou bahu pad bahu
Bipul nayan kou nayan bihina, rishtapushta kou ati tanakhina
94.2
Chhand
तन खीन कोउ अति पीन पावन कोउ अपावन गति धरें।
भूषन कराल कपाल कर सब सद्य सोनित तन भरें।।
खर स्वान सुअर सृकाल मुख गन बेष अगनित को गनै।
बहु जिनस प्रेत पिसाच जोगि जमात बरनत नहिं बनै।।
Tan khin kou ati pin pavan kou apavan gati dharen
Bhushan karal kapal kar sab sadya sonit tan bharen
Khar svan suar srikal mukh gan besh aganit ko ganai
Bahu jinas pret pisach jogi jamat baranat nahin banai
94.3
Doha/soratha
नाचहिं गावहिं गीत परम तरंगी भूत सब।
देखत अति बिपरीत बोलहिं बचन बिचित्र बिधि ॥93॥
Nachahin gavahin git param tarangi bhut sab
Dekhat ati biparit bolahin bachan bichitra bidhi