UtshovDoha 87
87.1
Chaupai
उभय घरी अस कौतुक भयऊ। जौ लगि कामु संभु पहिं गयऊ।।
सिवहि बिलोकि ससंकेउ मारू। भयउ जथाथिति सबु संसारू।।
भए तुरत सब जीव सुखारे। जिमि मद उतरि गएँ मतवारे।।
रुद्रहि देखि मदन भय माना। दुराधरष दुर्गम भगवाना।।
फिरत लाज कछु करि नहिं जाई। मरनु ठानि मन रचेसि उपाई।।
प्रगटेसि तुरत रुचिर रितुराजा। कुसुमित नव तरु राजि बिराजा।।
बन उपबन बापिका तड़ागा। परम सुभग सब दिसा बिभागा।।
जहँ तहँ जनु उमगत अनुरागा। देखि मुएहुँ मन मनसिज जागा।।
Ubhay ghari as kautuk bhayau, jau lagi kamu sambhu pahin gayau
Sivahi biloki sasankeu maru, bhayau jathathiti sabu sansaru
Bhae turat sab jiv sukhare, jimi mad utari gaem matavare
Rudrahi dekhi madan bhay mana, duradharash durgam bhagavana
Phirat laj kachhu kari nahin jai, maranu thani man rachesi upai
Pragatesi turat ruchir rituraja, kusumit nav taru raji biraja
Ban upaban bapika taraga, param subhag sab disa bibhaga
Jaham taham janu umagat anuraga, dekhi muehun man manasij jaga
87.2
Chhand
जागइ मनोभव मुएहुँ मन बन सुभगता न परै कही।
सीतल सुगंध सुमंद मारुत मदन अनल सखा सही।।
बिकसे सरन्हि बहु कंज गुंजत पुंज मंजुल मधुकरा।
कलहंस पिक सुक सरस रव करि गान नाचहिं अपछरा।।
Jagai manobhav muehun man ban subhagata na parai kahi
Sital sugandh sumand marut madan anal sakha sahi
Bikase saranhi bahu kanj gunjat punj manjul madhukara
Kalahans pik suk saras rav kari gan nachahin apachhara
87.3
Doha/soratha
सकल कला करि कोटि बिधि हारेउ सेन समेत।
चली न अचल समाधि सिव कोपेउ हृदयनिकेत ॥86॥
Sakal kala kari koti bidhi hareu sen samet
Chali na achal samadhi siv kopeu hridayaniket