UtshovDoha 327
327.1
Chaupai
जसि रघुबीर ब्याह बिधि बरनी। सकल कुअँर ब्याहे तेहिं करनी।।
कहि न जाइ कछु दाइज भूरी। रहा कनक मनि मंडपु पूरी।।
कंबल बसन बिचित्र पटोरे। भाँति भाँति बहु मोल न थोरे।।
गज रथ तुरग दास अरु दासी। धेनु अलंकृत कामदुहा सी।।
बस्तु अनेक करिअ किमि लेखा। कहि न जाइ जानहिं जिन्ह देखा।।
लोकपाल अवलोकि सिहाने। लीन्ह अवधपति सबु सुखु माने।।
दीन्ह जाचकन्हि जो जेहि भावा। उबरा सो जनवासेहिं आवा।।
तब कर जोरि जनकु मृदु बानी। बोले सब बरात सनमानी।।
Jasi raghubir byah bidhi barani, sakal kuanr byahe tehin karani
Kahi na jai kachhu daij bhuri, raha kanak mani mandapu puri
Kambal basan bichitra patore, bhanti bhanti bahu mol na thore
Gaj rath turag das aru dasi, dhenu alankrit kamaduha si
Bastu anek karia kimi lekha, kahi na jai janahin jinha dekha
Lokapal avaloki sihane, linha avadhapati sabu sukhu mane
Dinha jachakanhi jo jehi bhava, ubara so janavasehin ava
Tab kar jori janaku mridu bani, bole sab barat sanamani
327.2
Chhand
सनमानि सकल बरात आदर दान बिनय बड़ाइ कै।
प्रमुदित महा मुनि बृंद बंदे पूजि प्रेम लड़ाइ कै।।
सिरु नाइ देव मनाइ सब सन कहत कर संपुट किएँ।
सुर साधु चाहत भाउ सिंधु कि तोष जल अंजलि दिएँ ॥1॥
Sanamani sakal barat adar dan binay barai kai
Pramudit maha muni brind bande puji prem larai kai
Siru nai dev manai sab san kahat kar samput kiem
Sur sadhu chahat bhau sindhu ki tosh jal anjali diem
327.3
Chhand
कर जोरि जनकु बहोरि बंधु समेत कोसलराय सों।
बोले मनोहर बयन सानि सनेह सील सुभाय सों।।
संबंध राजन रावरें हम बड़े अब सब बिधि भए।
एहि राज साज समेत सेवक जानिबे बिनु गथ लए ॥2॥
Kar jori janaku bahori bandhu samet kosalaraya son
Bole manohar bayan sani saneh sil subhaya son
Sambandh rajan ravaren ham bare ab sab bidhi bhae
Ehi raj saj samet sevak janibe binu gath lae
327.4
Chhand
ए दारिका परिचारिका करि पालिबीं करुना नई।
अपराधु छमिबो बोलि पठए बहुत हौं ढीट्यो कई।।
पुनि भानुकुलभूषन सकल सनमान निधि समधी किए।
कहि जाति नहिं बिनती परस्पर प्रेम परिपूरन हिए ॥3॥
E darika paricharika kari palibin karuna nai
Aparadhu chhamibo boli pathae bahut haun dhityo kai
Puni bhanukulabhushan sakal sanaman nidhi samadhi kie
Kahi jati nahin binati paraspar prem paripuran hie
327.5
Chhand
बृंदारका गन सुमन बरिसहिं राउ जनवासेहि चले।
दुंदुभी जय धुनि बेद धुनि नभ नगर कौतूहल भले।।
तब सखीं मंगल गान करत मुनीस आयसु पाइ कै।
दूलह दुलहिनिन्ह सहित सुंदरि चलीं कोहबर ल्याइ कै ॥4॥
Brindaraka gan suman barisahin rau janavasehi chale
Dundubhi jay dhuni bed dhuni nabh nagar kautuhal bhale
Tab sakhin mangal gan karat munis ayasu pai kai
Dulah dulahininha sahit sundari chalin kohabar lyai kai
327.6
Doha/soratha
पुनि पुनि रामहि चितव सिय सकुचति मनु सकुचै न।
हरत मनोहर मीन छबि प्रेम पिआसे नैन ॥326॥
Puni puni ramahi chitav siy sakuchati manu sakuchai na
Harat manohar min chhabi prem piase nain