UtshovDoha 328
328.1
Chaupai
स्याम सरीरु सुभायँ सुहावन। सोभा कोटि मनोज लजावन।।
जावक जुत पद कमल सुहाए। मुनि मन मधुप रहत जिन्ह छाए।।
पीत पुनीत मनोहर धोती। हरति बाल रबि दामिनि जोती।।
कल किंकिनि कटि सूत्र मनोहर। बाहु बिसाल बिभूषन सुंदर।।
पीत जनेउ महाछबि देई। कर मुद्रिका चोरि चितु लेई।।
सोहत ब्याह साज सब साजे। उर आयत उरभूषन राजे।।
पिअर उपरना काखासोती। दुहुँ आँचरन्हि लगे मनि मोती।।
नयन कमल कल कुंडल काना। बदनु सकल सौंदर्ज निधाना।।
सुंदर भृकुटि मनोहर नासा। भाल तिलकु रुचिरता निवासा।।
सोहत मौरु मनोहर माथे। मंगलमय मुकुता मनि गाथे।।
Syam sariru subhayam suhavan, sobha koti manoj lajavan
Javak jut pad kamal suhae, muni man madhup rahat jinha chhae
Pit punit manohar dhoti, harati bal rabi damini joti
Kal kinkini kati sutra manohar, bahu bisal bibhushan sundar
Pit janeu mahachhabi dei, kar mudrika chori chitu lei
Sohat byah saj sab saje, ur ayat urabhushan raje
Piar uparana kakhasoti, duhun ancharanhi lage mani moti
Nayan kamal kal kundal kana, badanu sakal saundarja nidhana
Sundar bhrikuti manohar nasa, bhal tilaku ruchirata nivasa
Sohat mauru manohar mathe, mangalamay mukuta mani gathe
328.2
Chhand
गाथे महामनि मौर मंजुल अंग सब चित चोरहीं।
पुर नारि सुर सुंदरीं बरहि बिलोकि सब तिन तोरहीं।।
मनि बसन भूषन वारि आरति करहिं मंगल गावहिं।
सुर सुमन बरिसहिं सूत मागध बंदि सुजसु सुनावहीं ॥1॥
Gathe mahamani maur manjul ang sab chit chorahin
Pur nari sur sundarin barahi biloki sab tin torahin
Mani basan bhushan vari arati karahin mangal gavahin
Sur suman barisahin sut magadh bandi sujasu sunavahin
328.3
Chhand
कोहबरहिं आने कुँअर कुँअरि सुआसिनिन्ह सुख पाइ कै।
अति प्रीति लौकिक रीति लागीं करन मंगल गाइ कै।।
लहकौरि गौरि सिखाव रामहि सीय सन सारद कहैं।
रनिवासु हास बिलास रस बस जन्म को फलु सब लहैं ॥2॥
Kohabarahin ane kunar kunari suasininha sukh pai kai
Ati priti laukik riti lagin karan mangal gai kai
Lahakauri gauri sikhav ramahi siy san sarad kahain
Ranivasu has bilas ras bas janma ko phalu sab lahain
328.4
Chhand
निज पानि मनि महुँ देखिअति मूरति सुरूपनिधान की।
चालति न भुजबल्ली बिलोकनि बिरह भय बस जानकी।।
कौतुक बिनोद प्रमोदु प्रेमु न जाइ कहि जानहिं अलीं।
बर कुअँरि सुंदर सकल सखीं लवाइ जनवासेहि चलीं ॥3॥
Nij pani mani mahun dekhiati murati surupanidhan ki
Chalati na bhujaballi bilokani birah bhay bas janaki
Kautuk binod pramodu premu na jai kahi janahin alin
Bar kuanri sundar sakal sakhin lavai janavasehi chalin
328.5
Chhand
तेहि समय सुनिअ असीस जहँ तहँ नगर नभ आनँदु महा।
चिरु जिअहुँ जोरीं चारु चारयो मुदित मन सबहीं कहा।।
जोगीन्द्र सिद्ध मुनीस देव बिलोकि प्रभु दुंदुभि हनी।
चले हरषि बरषि प्रसून निज निज लोक जय जय जय भनी ॥4॥
Tehi samay sunia asis jaham taham nagar nabh anandu maha
Chiru jiahun jorin charu charayo mudit man sabahin kaha
Jogindra siddha munis dev biloki prabhu dundubhi hani
Chale harashi barashi prasun nij nij lok jay jay jay bhani
328.6
Doha/soratha
सहित बधूटिन्ह कुअँर सब तब आए पितु पास।
सोभा मंगल मोद भरि उमगेउ जनु जनवास ॥327॥
Sahit badhutinha kuanr sab tab ae pitu pas
Sobha mangal mod bhari umageu janu janavas