UtshovDoha 317
317.1
Chaupai
केकि कंठ दुति स्यामल अंगा। तड़ित बिनिंदक बसन सुरंगा।।
ब्याह बिभूषन बिबिध बनाए। मंगल सब सब भाँति सुहाए।।
सरद बिमल बिधु बदनु सुहावन। नयन नवल राजीव लजावन।।
सकल अलौकिक सुंदरताई। कहि न जाइ मनहीं मन भाई।।
बंधु मनोहर सोहहिं संगा। जात नचावत चपल तुरंगा।।
राजकुअँर बर बाजि देखावहिं। बंस प्रसंसक बिरिद सुनावहिं।।
जेहि तुरंग पर रामु बिराजे। गति बिलोकि खगनायकु लाजे।।
कहि न जाइ सब भाँति सुहावा। बाजि बेषु जनु काम बनावा।।
Keki kanth duti syamal anga, tarit binindak basan suranga
Byah bibhushan bibidh banae, mangal sab sab bhanti suhae
Sarad bimal bidhu badanu suhavan, nayan naval rajiv lajavan
Sakal alaukik sundaratai, kahi na jai manahin man bhai
Bandhu manohar sohahin sanga, jat nachavat chapal turanga
Rajakuanr bar baji dekhavahin, bans prasansak birid sunavahin
Jehi turang par ramu biraje, gati biloki khaganayaku laje
Kahi na jai sab bhanti suhava, baji beshu janu kam banava
317.2
Chhand
जनु बाजि बेषु बनाइ मनसिजु राम हित अति सोहई।
आपनें बय बल रूप गुन गति सकल भुवन बिमोहई।।
जगमगत जीनु जराव जोति सुमोति मनि मानिक लगे।
किंकिनि ललाम लगामु ललित बिलोकि सुर नर मुनि ठगे।।
Janu baji beshu banai manasiju ram hit ati sohai
Apanen bay bal rup gun gati sakal bhuvan bimohai
Jagamagat jinu jarav joti sumoti mani manik lage
Kinkini lalam lagamu lalit biloki sur nar muni thage
317.3
Doha/soratha
प्रभु मनसहिं लयलीन मनु चलत बाजि छबि पाव।
भूषित उड़गन तड़ित घनु जनु बर बरहि नचाव ॥316॥
Prabhu manasahin layalin manu chalat baji chhabi pav
Bhushit uragan tarit ghanu janu bar barahi nachav