UtshovDoha 212
212.1
Chhand
परसत पद पावन सोक नसावन प्रगट भई तपपुंज सही।
देखत रघुनायक जन सुख दायक सनमुख होइ कर जोरि रही।।
अति प्रेम अधीरा पुलक सरीरा मुख नहिं आवइ बचन कही।
अतिसय बड़भागी चरनन्हि लागी जुगल नयन जलधार बही।।
धीरजु मन कीन्हा प्रभु कहुँ चीन्हा रघुपति कृपाँ भगति पाई।
अति निर्मल बानीं अस्तुति ठानी ग्यानगम्य जय रघुराई।।
मै नारि अपावन प्रभु जग पावन रावन रिपु जन सुखदाई।
राजीव बिलोचन भव भय मोचन पाहि पाहि सरनहिं आई।।
मुनि श्राप जो दीन्हा अति भल कीन्हा परम अनुग्रह मैं माना।
देखेउँ भरि लोचन हरि भवमोचन इहइ लाभ संकर जाना।।
बिनती प्रभु मोरी मैं मति भोरी नाथ न मागउँ बर आना।
पद कमल परागा रस अनुरागा मम मन मधुप करै पाना।।
जेहिं पद सुरसरिता परम पुनीता प्रगट भई सिव सीस धरी।
सोइ पद पंकज जेहि पूजत अज मम सिर धरेउ कृपाल हरी।।
एहि भाँति सिधारी गौतम नारी बार बार हरि चरन परी।
जो अति मन भावा सो बरु पावा गै पतिलोक अनंद भरी।।
Parasat pad pavan sok nasavan pragat bhai tapapunj sahi
Dekhat raghunayak jan sukh dayak sanamukh hoi kar jori rahi
Ati prem adhira pulak sarira mukh nahin avai bachan kahi
Atisay barabhagi charananhi lagi jugal nayan jaladhar bahi
Dhiraju man kinha prabhu kahun chinha raghupati kripan bhagati pai
Ati nirmal banin astuti thani gyanagamya jay raghurai
Mai nari apavan prabhu jag pavan ravan ripu jan sukhadai
Rajiv bilochan bhav bhay mochan pahi pahi saranahin ai
Muni shrap jo dinha ati bhal kinha param anugrah main mana
Dekheum bhari lochan hari bhavamochan ihai labh sankar jana
Binati prabhu mori main mati bhori nath na magaum bar ana
Pad kamal paraga ras anuraga mam man madhup karai pana
Jehin pad surasarita param punita pragat bhai siv sis dhari
Soi pad pankaj jehi pujat aj mam sir dhareu kripal hari
Ehi bhanti sidhari gautam nari bar bar hari charan pari
Jo ati man bhava so baru pava gai patilok anand bhari
212.2
Doha/soratha
अस प्रभु दीनबंधु हरि कारन रहित दयाल।
तुलसिदास सठ तेहि भजु छाड़ि कपट जंजाल ॥211॥
As prabhu dinabandhu hari karan rahit dayal
Tulasidas sath tehi bhaju chhari kapat janjal