UtshovDoha 184
184.1
Chaupai
इंद्रजीत सन जो कछु कहेऊ। सो सब जनु पहिलेहिं करि रहेऊ।।
प्रथमहिं जिन्ह कहुँ आयसु दीन्हा। तिन्ह कर चरित सुनहु जो कीन्हा।।
देखत भीमरूप सब पापी। निसिचर निकर देव परितापी।।
करहि उपद्रव असुर निकाया। नाना रूप धरहिं करि माया।।
जेहि बिधि होइ धर्म निर्मूला। सो सब करहिं बेद प्रतिकूला।।
जेहिं जेहिं देस धेनु द्विज पावहिं। नगर गाउँ पुर आगि लगावहिं।।
सुभ आचरन कतहुँ नहिं होई। देव बिप्र गुरू मान न कोई।।
नहिं हरिभगति जग्य तप ग्याना। सपनेहुँ सुनिअ न बेद पुराना।।
Indrajit san jo kachhu kaheu, so sab janu pahilehin kari raheu
Prathamahin jinha kahun ayasu dinha, tinha kar charit sunahu jo kinha
Dekhat bhimarup sab papi, nisichar nikar dev paritapi
Karahi upadrav asur nikaya, nana rup dharahin kari maya
Jehi bidhi hoi dharma nirmula, so sab karahin bed pratikula
Jehin jehin des dhenu dvij pavahin, nagar gaum pur agi lagavahin
Subh acharan katahun nahin hoi, dev bipra guru man na koi
Nahin haribhagati jagya tap gyana, sapanehun sunia na bed purana
184.2
Chhand
जप जोग बिरागा तप मख भागा श्रवन सुनइ दससीसा।
आपुनु उठि धावइ रहै न पावइ धरि सब घालइ खीसा।।
अस भ्रष्ट अचारा भा संसारा धर्म सुनिअ नहि काना।
तेहि बहुबिधि त्रासइ देस निकासइ जो कह बेद पुराना।।
Jap jog biraga tap makh bhaga shravan sunai dasasisa
Apunu uthi dhavai rahai na pavai dhari sab ghalai khisa
As bhrashta achara bha sansara dharma sunia nahi kana
Tehi bahubidhi trasai des nikasai jo kah bed purana
184.3
Doha/soratha
बरनि न जाइ अनीति घोर निसाचर जो करहिं।
हिंसा पर अति प्रीति तिन्ह के पापहि कवनि मिति ॥183॥
Barani na jai aniti ghor nisachar jo karahin
Hinsa par ati priti tinha ke papahi kavani miti