UtshovDoha 103
103.1
Chaupai
बहु बिधि संभु सास समुझाई। गवनी भवन चरन सिरु नाई।।
जननीं उमा बोलि तब लीन्ही। लै उछंग सुंदर सिख दीन्ही।।
करेहु सदा संकर पद पूजा। नारिधरमु पति देउ न दूजा।।
बचन कहत भरे लोचन बारी। बहुरि लाइ उर लीन्हि कुमारी।।
कत बिधि सृजीं नारि जग माहीं। पराधीन सपनेहुँ सुखु नाहीं।।
भै अति प्रेम बिकल महतारी। धीरजु कीन्ह कुसमय बिचारी।।
पुनि पुनि मिलति परति गहि चरना। परम प्रेम कछु जाइ न बरना।।
सब नारिन्ह मिलि भेटि भवानी। जाइ जननि उर पुनि लपटानी।।
Bahu bidhi sambhu sas samujhai, gavani bhavan charan siru nai
Jananin uma boli tab linhi, lai uchhang sundar sikh dinhi
Karehu sada sankar pad puja, naridharamu pati deu na duja
Bachan kahat bhare lochan bari, bahuri lai ur linhi kumari
Kat bidhi srijin nari jag mahin, paradhin sapanehun sukhu nahin
Bhai ati prem bikal mahatari, dhiraju kinha kusamay bichari
Puni puni milati parati gahi charana, param prem kachhu jai na barana
Sab narinha mili bheti bhavani, jai janani ur puni lapatani
103.2
Chhand
जननिहि बहुरि मिलि चली उचित असीस सब काहूँ दईं।
फिरि फिरि बिलोकति मातु तन तब सखीं लै सिव पहिं गई।।
जाचक सकल संतोषि संकरु उमा सहित भवन चले।
सब अमर हरषे सुमन बरषि निसान नभ बाजे भले।।
Jananihi bahuri mili chali uchit asis sab kahun daim
Phiri phiri bilokati matu tan tab sakhin lai siv pahin gai
Jachak sakal santoshi sankaru uma sahit bhavan chale
Sab amar harashe suman barashi nisan nabh baje bhale
103.3
Doha/soratha
चले संग हिमवंतु तब पहुँचावन अति हेतु।
बिबिध भाँति परितोषु करि बिदा कीन्ह बृषकेतु ॥102॥
Chale sang himavantu tab pahunchavan ati hetu
Bibidh bhanti paritoshu kari bida kinha brishaketu