UtshovDoha 102
102.1
Chaupai
जसि बिबाह कै बिधि श्रुति गाई। महामुनिन्ह सो सब करवाई।।
गहि गिरीस कुस कन्या पानी। भवहि समरपीं जानि भवानी।।
पानिग्रहन जब कीन्ह महेसा। हिंयँ हरषे तब सकल सुरेसा।।
बेद मंत्र मुनिबर उच्चरहीं। जय जय जय संकर सुर करहीं।।
बाजहिं बाजन बिबिध बिधाना। सुमनबृष्टि नभ भै बिधि नाना।।
हर गिरिजा कर भयउ बिबाहू। सकल भुवन भरि रहा उछाहू।।
दासीं दास तुरग रथ नागा। धेनु बसन मनि बस्तु बिभागा।।
अन्न कनकभाजन भरि जाना। दाइज दीन्ह न जाइ बखाना।।
Jasi bibah kai bidhi shruti gai, mahamuninha so sab karavai
Gahi giris kus kanya pani, bhavahi samarapin jani bhavani
Panigrahan jab kinha mahesa, hinyam harashe tab sakal suresa
Bed mantra munibar uchcharahin, jay jay jay sankar sur karahin
Bajahin bajan bibidh bidhana, sumanabrishti nabh bhai bidhi nana
Har girija kar bhayau bibahu, sakal bhuvan bhari raha uchhahu
Dasin das turag rath naga, dhenu basan mani bastu bibhaga
Anna kanakabhajan bhari jana, daij dinha na jai bakhana
102.2
Chhand
दाइज दियो बहु भाँति पुनि कर जोरि हिमभूधर कह्यो।
का देउँ पूरनकाम संकर चरन पंकज गहि रह्यो।।
सिवँ कृपासागर ससुर कर संतोषु सब भाँतिहिं कियो।
पुनि गहे पद पाथोज मयनाँ प्रेम परिपूरन हियो।।
Daij diyo bahu bhanti puni kar jori himabhudhar kahyo
Ka deum puranakam sankar charan pankaj gahi rahyo
Sivam kripasagar sasur kar santoshu sab bhantihin kiyo
Puni gahe pad pathoj mayanan prem paripuran hiyo
102.3
Doha/soratha
नाथ उमा मन प्रान सम गृहकिंकरी करेहु।
छमेहु सकल अपराध अब होइ प्रसन्न बरु देहु ॥101॥
Nath uma man pran sam grihakinkari karehu
Chhamehu sakal aparadh ab hoi prasanna baru dehu