UtshovChapter 42
42.1
ब्रह्मोवाच
अहंकारात्प्रसूतानि महाभूतानि पञ्च वै
पृथिवी वायुराकाशमापो ज्योतिश्च पञ्चमम्
Brahmovacha
Ahankaratprasutani mahabhutani pancha vai
Prithivi vayurakashamapo jyotishcha panchamam
42.2
तेषु भूतानि मुह्यन्ते महाभूतेषु पञ्चसु
शब्दस्पर्शनरूपेषु रसगन्धक्रियासु च
Teshu bhutani muhyante mahabhuteshu panchasu
Shabdasparshanarupeshu rasagandhakriyasu cha
42.3
महाभूतविनाशान्ते प्रलये प्रत्युपस्थिते
सर्वप्राणभृतां धीरा महदुत्पद्यते भयम्
Mahabhutavinashante pralaye pratyupasthite
Sarvapranabhritam dhira mahadutpadyate bhayam
42.4
यद्यस्माज्जायते भूतं तत्र तत्प्रविलीयते
लीयन्ते प्रतिलोमानि जायन्ते चोत्तरोत्तरम्
Yadyasmajjayate bhutam tatra tatpraviliyate
Liyante pratilomani jayante chottarottaram
42.5
ततः प्रलीने सर्वस्मिन्भूते स्थावरजङ्गमे
स्मृतिमन्तस्तदा धीरा न लीयन्ते कदाचन
Tatah praline sarvasminbhute sthavarajangame
Smritimantastada dhira na liyante kadachana
42.6
शब्दः स्पर्शस्तथा रूपं रसो गन्धश्च पञ्चमः
क्रियाकारणयुक्ताः स्युरनित्या मोहसंज्ञिताः
Shabdah sparshastatha rupam raso gandhashcha panchamah
Kriyakaranayuktah syuranitya mohasangyitah
42.7
लोभप्रजनसंयुक्ता निर्विशेषा ह्यकिंचनाः
मांसशोणितसंघाता अन्योन्यस्योपजीविनः
Lobhaprajanasanyukta nirvishesha hyakinchanah
Mansashonitasanghata anyonyasyopajivinah
42.8
बहिरात्मान इत्येते दीनाः कृपणवृत्तयः
प्राणापानावुदानश्च समानो व्यान एव च
Bahiratmana ityete dinah kripanavrittayah
Pranapanavudanashcha samano vyana eva cha
42.9
अन्तरात्मेति चाप्येते नियताः पञ्च वायवः
वाङ्मनोबुद्धिरित्येभिः सार्धमष्टात्मकं जगत्
Antaratmeti chapyete niyatah pancha vayavah
Vanmanobuddhirityebhih sardhamashtatmakam jagat
42.10
त्वग्घ्राणश्रोत्रचक्षूंषि रसनं वाक्च संयता
विशुद्धं च मनो यस्य बुद्धिश्चाव्यभिचारिणी
Tvagghranashrotrachakshunshi rasanam vakcha sanyata
Vishuddham cha mano yasya buddhishchavyabhicharini
42.11
अष्टौ यस्याग्नयो ह्येते न दहन्ते मनः सदा
स तद्ब्रह्म शुभं याति यस्माद्भूयो न विद्यते
Ashtau yasyagnayo hyete na dahante manah sada
Sa tadbrahma shubham yati yasmadbhuyo na vidyate
42.12
एकादश च यान्याहुरिन्द्रियाणि विशेषतः
अहंकारप्रसूतानि तानि वक्ष्याम्यहं द्विजाः
Ekadasha cha yanyahurindriyani visheshatah
Ahankaraprasutani tani vakshyamyaham dvijah
42.13
श्रोत्रं त्वक्चक्षुषी जिह्वा नासिका चैव पञ्चमी
पादौ पायुरुपस्थं च हस्तौ वाग्दशमी भवेत्
Shrotram tvakchakshushi jihva nasika chaiva panchami
Padau payurupastham cha hastau vagdashami bhavet
42.14
इन्द्रियग्राम इत्येष मन एकादशं भवेत्
एतं ग्रामं जयेत्पूर्वं ततो ब्रह्म प्रकाशते
Indriyagrama ityesha mana ekadasham bhavet
Etam gramam jayetpurvam tato brahma prakashate
42.15
बुद्धीन्द्रियाणि पञ्चाहुः पञ्च कर्मेन्द्रियाणि च
श्रोत्रादीन्यपि पञ्चाहुर्बुद्धियुक्तानि तत्त्वतः
Buddhindriyani panchahuh pancha karmendriyani cha
Shrotradinyapi panchahurbuddhiyuktani tattvatah
42.16
अविशेषाणि चान्यानि कर्मयुक्तानि तानि तु
उभयत्र मनो ज्ञेयं बुद्धिर्द्वादशमी भवेत्
Avisheshani chanyani karmayuktani tani tu
Ubhayatra mano gyeyam buddhirdvadashami bhavet
42.17
इत्युक्तानीन्द्रियाणीमान्येकादश मया क्रमात्
मन्यन्ते कृतमित्येव विदित्वैतानि पण्डिताः
Ityuktanindriyanimanyekadasha maya kramat
Manyante kritamityeva viditvaitani panditah
42.18
त्रीणि स्थानानि भूतानां चतुर्थं नोपपद्यते
स्थलमापस्तथाकाशं जन्म चापि चतुर्विधम्
Trini sthanani bhutanam chaturtham nopapadyate
Sthalamapastathakasham janma chapi chaturvidham
42.19
अण्डजोद्भिज्जसंस्वेदजरायुजमथापि च
चतुर्धा जन्म इत्येतद्भूतग्रामस्य लक्ष्यते
Andajodbhijjasansvedajarayujamathapi cha
Chaturdha janma ityetadbhutagramasya lakshyate
42.20
अचराण्यपि भूतानि खेचराणि तथैव च
अण्डजानि विजानीयात्सर्वांश्चैव सरीसृपान्
Acharanyapi bhutani khecharani tathaiva cha
Andajani vijaniyatsarvanshchaiva sarisripan
42.21
संस्वेदाः कृमयः प्रोक्ता जन्तवश्च तथाविधाः
जन्म द्वितीयमित्येतज्जघन्यतरमुच्यते
Sansvedah krimayah prokta jantavashcha tathavidhah
Janma dvitiyamityetajjaghanyataramuchyate
42.22
भित्त्वा तु पृथिवीं यानि जायन्ते कालपर्ययात्
उद्भिज्जानीति तान्याहुर्भूतानि द्विजसत्तमाः
Bhittva tu prithivim yani jayante kalaparyayat
Udbhijjaniti tanyahurbhutani dvijasattamah
42.23
द्विपादबहुपादानि तिर्यग्गतिमतीनि च
जरायुजानि भूतानि वित्त तान्यपि सत्तमाः
Dvipadabahupadani tiryaggatimatini cha
Jarayujani bhutani vitta tanyapi sattamah
42.24
द्विविधापीह विज्ञेया ब्रह्मयोनिः सनातना
तपः कर्म च यत्पुण्यमित्येष विदुषां नयः
Dvividhapiha vigyeya brahmayonih sanatana
Tapah karma cha yatpunyamityesha vidusham nayah
42.25
द्विविधं कर्म विज्ञेयमिज्या दानं च यन्मखे
जातस्याध्ययनं पुण्यमिति वृद्धानुशासनम्
Dvividham karma vigyeyamijya danam cha yanmakhe
Jatasyadhyayanam punyamiti vriddhanushasanam
42.26
एतद्यो वेद विधिवत्स मुक्तः स्याद्द्विजर्षभाः
विमुक्तः सर्वपापेभ्य इति चैव निबोधत
Etadyo veda vidhivatsa muktah syaddvijarshabhah
Vimuktah sarvapapebhya iti chaiva nibodhata
42.27
आकाशं प्रथमं भूतं श्रोत्रमध्यात्ममुच्यते
अधिभूतं तथा शब्दो दिशस्तत्राधिदैवतम्
Akasham prathamam bhutam shrotramadhyatmamuchyate
Adhibhutam tatha shabdo dishastatradhidaivatam
42.28
द्वितीयं मारुतो भूतं त्वगध्यात्मं च विश्रुतम्
स्प्रष्टव्यमधिभूतं च विद्युत्तत्राधिदैवतम्
Dvitiyam maruto bhutam tvagadhyatmam cha vishrutam
Sprashtavyamadhibhutam cha vidyuttatradhidaivatam
42.29
तृतीयं ज्योतिरित्याहुश्चक्षुरध्यात्ममुच्यते
अधिभूतं ततो रूपं सूर्यस्तत्राधिदैवतम्
Tritiyam jyotirityahushchakshuradhyatmamuchyate
Adhibhutam tato rupam suryastatradhidaivatam
42.30
चतुर्थमापो विज्ञेयं जिह्वा चाध्यात्ममिष्यते
अधिभूतं रसश्चात्र सोमस्तत्राधिदैवतम्
Chaturthamapo vigyeyam jihva chadhyatmamishyate
Adhibhutam rasashchatra somastatradhidaivatam
42.31
पृथिवी पञ्चमं भूतं घ्राणश्चाध्यात्ममिष्यते
अधिभूतं तथा गन्धो वायुस्तत्राधिदैवतम्
Prithivi panchamam bhutam ghranashchadhyatmamishyate
Adhibhutam tatha gandho vayustatradhidaivatam
42.32
एष पञ्चसु भूतेषु चतुष्टयविधिः स्मृतः
अतः परं प्रवक्ष्यामि सर्वं त्रिविधमिन्द्रियम्
Esha panchasu bhuteshu chatushtayavidhih smritah
Atah param pravakshyami sarvam trividhamindriyam
42.33
पादावध्यात्ममित्याहुर्ब्राह्मणास्तत्त्वदर्शिनः
अधिभूतं तु गन्तव्यं विष्णुस्तत्राधिदैवतम्
Padavadhyatmamityahurbrahmanastattvadarshinah
Adhibhutam tu gantavyam vishnustatradhidaivatam
42.34
अवाग्गतिरपानश्च पायुरध्यात्ममिष्यते
अधिभूतं विसर्गश्च मित्रस्तत्राधिदैवतम्
Avaggatirapanashcha payuradhyatmamishyate
Adhibhutam visargashcha mitrastatradhidaivatam
42.35
प्रजनः सर्वभूतानामुपस्थोऽध्यात्ममुच्यते
अधिभूतं तथा शुक्रं दैवतं च प्रजापतिः
Prajanah sarvabhutanamupasthodhyatmamuchyate
Adhibhutam tatha shukram daivatam cha prajapatih
42.36
हस्तावध्यात्ममित्याहुरध्यात्मविदुषो जनाः
अधिभूतं तु कर्माणि शक्रस्तत्राधिदैवतम्
Hastavadhyatmamityahuradhyatmavidusho janah
Adhibhutam tu karmani shakrastatradhidaivatam
42.37
वैश्वदेवी मनःपूर्वा वागध्यात्ममिहोच्यते
वक्तव्यमधिभूतं च वह्निस्तत्राधिदैवतम्
Vaishvadevi manahpurva vagadhyatmamihochyate
Vaktavyamadhibhutam cha vahnistatradhidaivatam
42.38
अध्यात्मं मन इत्याहुः पञ्चभूतानुचारकम्
अधिभूतं च मन्तव्यं चन्द्रमाश्चाधिदैवतम्
Adhyatmam mana ityahuh panchabhutanucharakam
Adhibhutam cha mantavyam chandramashchadhidaivatam
42.39
अध्यात्मं बुद्धिरित्याहुः षडिन्द्रियविचारिणी
अधिभूतं तु विज्ञेयं ब्रह्मा तत्राधिदैवतम्
Adhyatmam buddhirityahuh shadindriyavicharini
Adhibhutam tu vigyeyam brahma tatradhidaivatam
42.40
यथावदध्यात्मविधिरेष वः कीर्तितो मया
ज्ञानमस्य हि धर्मज्ञाः प्राप्तं बुद्धिमतामिह
Yathavadadhyatmavidhiresha vah kirtito maya
Gyanamasya hi dharmagyah praptam buddhimatamiha
42.41
इन्द्रियाणीन्द्रियार्थाश्च महाभूतानि पञ्च च
सर्वाण्येतानि संधाय मनसा संप्रधारयेत्
Indriyanindriyarthashcha mahabhutani pancha cha
Sarvanyetani sandhaya manasa sampradharayet
42.42
क्षीणे मनसि सर्वस्मिन्न जन्मसुखमिष्यते
ज्ञानसंपन्नसत्त्वानां तत्सुखं विदुषां मतम्
Kshine manasi sarvasminna janmasukhamishyate
Gyanasampannasattvanam tatsukham vidusham matam
42.43
अतः परं प्रवक्ष्यामि सूक्ष्मभावकरीं शिवाम्
निवृत्तिं सर्वभूतेषु मृदुना दारुणेन वा
Atah param pravakshyami sukshmabhavakarim shivam
Nivrittim sarvabhuteshu mriduna darunena va
42.44
गुणागुणमनासङ्गमेकचर्यमनन्तरम्
एतद्ब्राह्मणतो वृत्तमाहुरेकपदं सुखम्
Gunagunamanasangamekacharyamanantaram
Etadbrahmanato vrittamahurekapadam sukham
42.45
विद्वान्कूर्म इवाङ्गानि कामान्संहृत्य सर्वशः
विरजाः सर्वतो मुक्तो यो नरः स सुखी सदा
Vidvankurma ivangani kamansanhritya sarvashah
Virajah sarvato mukto yo narah sa sukhi sada
42.46
कामानात्मनि संयम्य क्षीणतृष्णः समाहितः
सर्वभूतसुहृन्मैत्रो ब्रह्मभूयं स गच्छति
Kamanatmani sanyamya kshinatrishnah samahitah
Sarvabhutasuhrinmaitro brahmabhuyam sa gachchhati
42.47
इन्द्रियाणां निरोधेन सर्वेषां विषयैषिणाम्
मुनेर्जनपदत्यागादध्यात्माग्निः समिध्यते
Indriyanam nirodhena sarvesham vishayaishinam
Munerjanapadatyagadadhyatmagnih samidhyate
42.48
यथाग्निरिन्धनैरिद्धो महाज्योतिः प्रकाशते
तथेन्द्रियनिरोधेन महानात्मा प्रकाशते
Yathagnirindhanairiddho mahajyotih prakashate
Tathendriyanirodhena mahanatma prakashate
42.49
यदा पश्यति भूतानि प्रसन्नात्मात्मनो हृदि
स्वयंयोनिस्तदा सूक्ष्मात्सूक्ष्ममाप्नोत्यनुत्तमम्
Yada pashyati bhutani prasannatmatmano hridi
Svayanyonistada sukshmatsukshmamapnotyanuttamam
42.50
अग्नी रूपं पयः स्रोतो वायुः स्पर्शनमेव च
मही पङ्कधरं घोरमाकाशं श्रवणं तथा
Agni rupam payah sroto vayuh sparshanameva cha
Mahi pankadharam ghoramakasham shravanam tatha
42.51
रागशोकसमाविष्टं पञ्चस्रोतःसमावृतम्
पञ्चभूतसमायुक्तं नवद्वारं द्विदैवतम्
Ragashokasamavishtam panchasrotahsamavritam
Panchabhutasamayuktam navadvaram dvidaivatam
42.52
रजस्वलमथादृश्यं त्रिगुणं च त्रिधातुकम्
संसर्गाभिरतं मूढं शरीरमिति धारणा
Rajasvalamathadrishyam trigunam cha tridhatukam
Sansargabhiratam mudham shariramiti dharana
42.53
दुश्चरं जीवलोकेऽस्मिन्सत्त्वं प्रति समाश्रितम्
एतदेव हि लोकेऽस्मिन्कालचक्रं प्रवर्तते
Dushcharam jivalokesminsattvam prati samashritam
Etadeva hi lokesminkalachakram pravartate
42.54
एतन्महार्णवं घोरमगाधं मोहसंज्ञितम्
विसृजेत्संक्षिपेच्चैव बोधयेत्सामरं जगत्
Etanmaharnavam ghoramagadham mohasangyitam
Visrijetsankshipechchaiva bodhayetsamaram jagat
42.55
कामक्रोधौ भयं मोहमभिद्रोहमथानृतम्
इन्द्रियाणां निरोधेन स तांस्त्यजति दुस्त्यजान्
Kamakrodhau bhayam mohamabhidrohamathanritam
Indriyanam nirodhena sa tanstyajati dustyajan
42.56
यस्यैते निर्जिता लोके त्रिगुणाः पञ्च धातवः
व्योम्नि तस्य परं स्थानमनन्तमथ लक्ष्यते
Yasyaite nirjita loke trigunah pancha dhatavah
Vyomni tasya param sthanamanantamatha lakshyate
42.57
कामकूलामपारान्तां मनःस्रोतोभयावहाम्
नदीं दुर्गह्रदां तीर्णः कामक्रोधावुभौ जयेत्
Kamakulamaparantam manahsrotobhayavaham
Nadim durgahradam tirnah kamakrodhavubhau jayet
42.58
स सर्वदोषनिर्मुक्तस्ततः पश्यति यत्परम्
मनो मनसि संधाय पश्यत्यात्मानमात्मनि
Sa sarvadoshanirmuktastatah pashyati yatparam
Mano manasi sandhaya pashyatyatmanamatmani
42.59
सर्ववित्सर्वभूतेषु वीक्षत्यात्मानमात्मनि
एकधा बहुधा चैव विकुर्वाणस्ततस्ततः
Sarvavitsarvabhuteshu vikshatyatmanamatmani
Ekadha bahudha chaiva vikurvanastatastatah
42.60
ध्रुवं पश्यति रूपाणि दीपाद्दीपशतं यथा
स वै विष्णुश्च मित्रश्च वरुणोऽग्निः प्रजापतिः
Dhruvam pashyati rupani dipaddipashatam yatha
Sa vai vishnushcha mitrashcha varunognih prajapatih
42.61
स हि धाता विधाता च स प्रभुः सर्वतोमुखः
हृदयं सर्वभूतानां महानात्मा प्रकाशते
Sa hi dhata vidhata cha sa prabhuh sarvatomukhah
Hridayam sarvabhutanam mahanatma prakashate
42.62
तं विप्रसंघाश्च सुरासुराश्च; यक्षाः पिशाचाः पितरो वयांसि
रक्षोगणा भूतगणाश्च सर्वे; महर्षयश्चैव सदा स्तुवन्ति
Tam viprasanghashcha surasurashcha; yakshah pishachah pitaro vayansi
Rakshogana bhutaganashcha sarve; maharshayashchaiva sada stuvanti