Sukta 9

9.1

Virat, 1-26 atharva, kashyapah, sarve rishayah, chhandansi cha, virat, trishtup, 2 panktih, 3 astarapanktih, 4-5, 23, 25-26 anushtup, 8, 11-12, 22 jagati, 9 bhurik, 14 chatushpadatijagati

कुत॒स्तौ जा॒तौ क॑त॒मः सो अर्धः॒ कस्मा॑ल्लो॒कात् क॑त॒मस्याः॑ पृथि॒व्याः ।
व॒त्सौ वि॒राजः॑ सलि॒लादुदै॑तां॒ तौ त्वा॑ पृछामि कत॒रेण॑ दु॒ग्धा ॥१॥

Kutastau jatau katamah so ardhah kasmallokat katamasyah prithivyah
Vatsau virajah saliladudaitam tau tva prichhami katarena dugdha

9.2

यो अक्र॑न्दयत् सलि॒लं म॑हि॒त्वा योनिं॑ कृ॒त्वा त्रि॒भुजं॒ शया॑नः ।
व॒त्सः का॑म॒दुघो॑ वि॒राजः॒ स गुहा॑ चक्रे त॒न्वःऽ परा॒चैः ॥२॥

Yo akrandayat salilam mahitva yonim kritva tribhujam shayanah
Vatsah kamadugho virajah sa guha chakre tanvah parachaih

9.3

यानि॒ त्रीणि॑ बृ॒हन्ति॑ येषां॑ चतु॒र्थं वि॑यु॒नक्ति॒ वाच॑म्।
ब्र॒ह्मैन॑द् विद्या॒त् तप॑सा विप॒श्चिद् यस्मि॒न्नेकं॑ यु॒ज्यते॒ यस्मि॒न्नेक॑म् ॥३॥

Yani trini brihanti yesham chaturtham viyunakti vacham
Brahmainad vidyat tapasa vipashchid yasminnekam yujyate yasminnekam

9.4

बृ॒ह॒तः परि॒ सामा॑नि ष॒ष्ठात् पञ्चाधि॒ निर्मि॑ता ।
बृ॒हद् बृ॑ह॒त्या निर्मि॑तं॒ कुतोऽधि॑ बृह॒ती मि॒ता ॥४॥

Brihatah pari samani shashthat panchadhi nirmita
Brihad brihatya nirmitam kutodhi brihati mita

9.5

बृ॒ह॒ती परि॑ मात्रा॑या मा॒तुर्मात्राधि॒ निर्मि॑ता ।
मा॒या ह॑ जज्ञे मा॒याया॑ मा॒याया॒ मातली॒ परि॑ ॥५॥

Brihati pari matraya maturmatradhi nirmita
Maya ha jagye mayaya mayaya matali pari

9.6

वै॒श्वा॒न॒रस्य॑ प्रति॒मोपरि॒ द्यौर्याव॒द् रोद॑सी विबबा॒धे अ॒ग्निः ।
ततः॑ ष॒ष्ठादामुतो॑ यन्ति॒ स्तोमा॒ उदि॒तो य॑न्त्य॒भि ष॒ष्ठमह्नः॑ ॥६॥

Vaishvanarasya pratimopari dyauryavad rodasi vibabadhe agnih
Tatah shashthadamuto yanti stoma udito yantyabhi shashthamahnah

9.7

षट् त्वा॑ पृछाम॒ ऋष॑यः कश्यपे॒मे त्वं हि यु॒क्तं यु॑यु॒क्षे योग्यं॑ च ।
वि॒राज॑माहु॒र्ब्रह्म॑णः पि॒तरं॒ तां नो॒ वि धे॑हि यति॒धा सखि॑भ्यः ॥७॥

Shat tva prichhama rishayah kashyapeme tvam hi yuktam yuyukshe yogyam cha
Virajamahurbrahmanah pitaram tam no vi dhehi yatidha sakhibhyah

9.8

यां प्रच्यु॑ता॒मनु॑ य॒ज्ञाः प्र॒च्यव॑न्त उप॒तिष्ठ॑न्त उप॒तिष्ठ॑मानाम्।
यस्या॑ व्र॒ते प्र॑स॒वे य॒क्षमेज॑ति॒ सा वि॒राडृषयः पर॒मे व्योऽमन् ॥८॥

Yam prachyutamanu yagyah prachyavanta upatishthanta upatishthamanam
Yasya vrate prasave yakshamejati sa viradrishayah parame vyoman

9.9

अ॒प्रा॒णैति॑ प्रा॒णेन॑ प्राण॒तीनां॑ वि॒राट् स्व॒राज॑म॒भ्येऽति प॒श्चात्।
विश्वं॑ मृ॒शन्ती॑म॒भिरू॑पां वि॒राजं॒ पश्य॑न्ति॒ त्वे न त्वे प॑श्यन्त्येनाम् ॥९॥

Apranaiti pranena pranatinam virat svarajamabhyeti pashchat
Vishvam mrishantimabhirupam virajam pashyanti tve na tve pashyantyenam

9.10

को वि॒राजो॑ मिथुन॒त्वं प्र वे॑द॒ क ऋ॒तून् क उ॒ कल्प॑मस्याः ।
क्रमा॒न् को अ॑स्याः कति॒धा विदु॑ग्धा॒न् को अ॑स्या॒ धाम॑ कति॒धा व्युऽष्टीः ॥१०॥

Ko virajo mithunatvam pra veda ka ritun ka u kalpamasyah
Kraman ko asyah katidha vidugdhan ko asya dhama katidha vyushtih

9.11

इ॒यमे॒व सा या प्र॑थ॒मा व्यौच्छ॑दा॒स्वित॑रासु चरति॒ प्रवि॑ष्टा ।
म॒हान्तो॑ अस्यां महि॒मानो॑ अ॒न्तर्वधूर्जि॑गाय नव॒गज्जनि॑त्री ॥११॥

Iyameva sa ya prathama vyauchchhadasvitarasu charati pravishta
Mahanto asyam mahimano antarvadhurjigaya navagajjanitri

9.12

छन्दः॑पक्षे उ॒षसा॒ पेपि॑शाने समा॒नं योनि॒मनु॒ सं च॑रेमे ।
सूर्य॑पत्नी॒ सं च॑रतः प्रजान॒ती के॑तु॒मती॑ अ॒जरे॒ भूरि॑रेतसा ॥१२॥

Chhandahpakshe ushasa pepishane samanam yonimanu sam chareme
Suryapatni sam charatah prajanati ketumati ajare bhuriretasa

9.13

ऋ॒तस्य॒ पन्था॒मनु॑ ति॒स्र आगु॒स्त्रयो॑ घ॒र्मा अनु॑ रेत॒ आगुः॑ ।
प्र॒जामेका॒ जिन्व॒त्यूर्ज॒मेका॑ रा॒ष्ट्रमेका॑ रक्षति देवयू॒नाम् ॥१३॥

Ritasya panthamanu tisra agustrayo gharma anu reta aguh
Prajameka jinvatyurjameka rashtrameka rakshati devayunam

9.14

अ॒ग्नीषोमा॑वदधु॒र्या तु॒रीयासी॑द् य॒ज्ञस्य॑ प॒क्षावृष॑यः क॒ल्पय॑न्तः ।
गा॒य॒त्रीं त्रि॒ष्टुभं॒ जग॑तीमनु॒ष्टुभं॑ बृहद॒र्कीं यज॑मानाय॒ स्वऽरा॒भर॑न्तीम् ॥१४॥

Agnishomavadadhurya turiyasid yagyasya pakshavrishayah kalpayantah
Gayatrim trishtubham jagatimanushtubham brihadarkim yajamanaya svarabharantim

9.15

पञ्च॒ व्युऽष्टी॒रनु॒ पञ्च॒ दोहा॒ गां पञ्च॑नाम्नीमृ॒तवोऽनु॒ पञ्च॑ ।
पञ्च॒ दिशः॑ पञ्चद॒शेन॑ क्लृ॒प्तस्ता एक॑मूर्ध्नीर॒भि लो॒कमेक॑म् ॥१५॥

Pancha vyushtiranu pancha doha gam panchanamnimritavonu pancha
Pancha dishah panchadashena klriptasta ekamurdhnirabhi lokamekam

9.16

षड् जा॒ता भू॒ता प्र॑थम॒जर्तस्य॑ षडु॒ सामा॑नि षड॒हं व॑हन्ति ।
ष॒ड्यो॒गं सीर॒मनु॒ साम॑साम॒ षडा॑हु॒र्द्यावा॑पृथि॒वीः षडु॒र्वीः ॥१६॥

Shad jata bhuta prathamajartasya shadu samani shadaham vahanti
Shadyogam siramanu samasama shadahurdyavaprithivih shadurvih

9.17

षडा॑हुः शी॒तान् षडु॑ मा॒स उ॒ष्णानृ॒तुं नो॑ ब्रूत यत॒मोऽति॑रिक्तः ।
स॒प्त सु॑प॒र्णाः क॒वयो॒ नि षे॑दुः स॒प्त च्छन्दां॒स्यनु॑ स॒प्त दी॒क्षाः ॥१७॥

Shadahuh shitan shadu masa ushnanritum no bruta yatamotiriktah
Sapta suparnah kavayo ni sheduh sapta chchhandansyanu sapta dikshah

9.18

स॒प्त होमाः॑ स॒मिधो॑ ह स॒प्त मधू॑नि स॒प्तर्तवो॑ ह स॒प्त।
स॒प्ताज्या॑नि॒ परि॑ भू॒तमा॑य॒न् ताः स॑प्तगृ॒ध्रा इति॑ शुश्रुमा व॒यम् ॥१८॥

Sapta homah samidho ha sapta madhuni saptartavo ha sapta
Saptajyani pari bhutamayan tah saptagridhra iti shushruma vayam

9.19

स॒प्त च्छन्दां॑सि चतुरुत्त॒राण्य॒न्यो अ॒न्यस्मि॒न्नध्यार्पि॑तानि ।
क॒थं स्तोमाः॒ प्रति॑ तिष्ठन्ति॒ तेषु॒ तानि॒ स्तोमे॑षु॒ क॒थमार्पि॑तानि ॥१९॥

Sapta chchhandansi chaturuttaranyanyo anyasminnadhyarpitani
Katham stomah prati tishthanti teshu tani stomeshu kathamarpitani

9.20

क॒थं गा॑य॒त्री त्रि॒वृतं॒ व्याऽप क॒थं त्रि॒ष्टुप् प॑ञ्चद॒शेन॑ कल्पते ।
त्र॒य॒स्त्रिं॒शेन॒ जग॑ती क॒थम॑नु॒ष्टुप् क॒थमे॑कविं॒शः ॥२०॥

Katham gayatri trivritam vyapa katham trishtup panchadashena kalpate
Trayastrinshena jagati kathamanushtup kathamekavinshah

9.21

अ॒ष्ट जा॒ता भू॒ता प्र॑थम॒जर्तस्या॒ष्टेन्द्र॒र्त्विजो॒ दैव्या॒ ये।
अ॒ष्टयो॑नि॒रदि॑तिर॒ष्टपु॑त्राष्ट॒मीं रात्रि॑म॒भि ह॒व्यमे॑ति ॥२१॥

Ashta jata bhuta prathamajartasyashtendrartvijo daivya ye
Ashtayoniraditirashtaputrashtamim ratrimabhi havyameti

9.22

इ॒त्थं श्रेयो॒ मन्य॑माने॒दमाग॑मं यु॒ष्माकं॑ स॒ख्ये अ॒हम॑स्मि॒ शेवा॑ ।
स॒मा॒नज॑न्मा॒ क्रतु॑रस्ति वः शि॒वः स वः॒ सर्वाः॒ सं च॑रति प्रजा॒नन् ॥२२॥

Ittham shreyo manyamanedamagamam yushmakam sakhye ahamasmi sheva
Samanajanma kraturasti vah shivah sa vah sarvah sam charati prajanan

9.23

अ॒ष्टेन्द्र॑स्य॒ षड् य॒मस्य॒ ऋषी॑णां स॒प्त स॑प्त॒धा।
अ॒पो म॑नु॒ष्या॒३नोष॑धी॒स्ताँ उ॒ पञ्चानु॑ सेचिरे ॥२३॥

Ashtendrasya shad yamasya rishinam sapta saptadha
Apo manushya3noshadhistam u panchanu sechire

9.24

केव॒लीन्द्रा॑य दुदु॒हे हि गृ॒ष्टिर्वशं पी॒यूषं॑ प्रथ॒मं दुहा॑ना ।
अथा॑तर्पयच्च॒तुर॑श्चतु॒र्धा दे॒वान् म॑नु॒ष्याँ॒३ असु॑रानु॒त ऋषी॑न् ॥२४॥

Kevalindraya duduhe hi grishtirvasham piyusham prathamam duhana
Athatarpayachchaturashchaturdha devan manushyan3 asuranuta rishin

9.25

को नु गौः क ए॑कऋ॒षिः किमु॒ धाम॒ का आ॒शिषः॑ ।
य॒क्षं पृ॑थि॒व्यामे॑क॒वृदे॑क॒र्तुः क॑त॒मो नु सः ॥२५॥

Ko nu gauh ka ekarishih kimu dhama ka ashishah
Yaksham prithivyamekavridekartuh katamo nu sah

9.26

एको॒ गौरेक॑ एकऋ॒षिरेकं॒ धामै॑क॒धाशिषः॑ ।
य॒क्षं पृ॑थि॒व्यामे॑क॒वृदे॑क॒र्तुर्नाति॑ रिच्यते ॥२६॥

Eko gaureka ekarishirekam dhamaikadhashishah
Yaksham prithivyamekavridekarturnati richyate