Sukta 82

82.1

Agnih, 1-6 shaunakah (sampatkamah), agnih, trishtup, 2 kakummati brihati, 3 jagati

अ॒भ्यऽर्चत सुष्टु॒तिं गव्य॑मा॒जिम॒स्मासु॑ भ॒द्रा द्रवि॑णानि धत्त ।
इ॒मं य॒ज्ञं न॑यत दे॒वता॑ नो घृ॒तस्य॒ धारा॒ मधु॑मत् पवन्ताम् ॥१॥

Abhyarchata sushtutim gavyamajimasmasu bhadra dravinani dhatta
Imam yagyam nayata devata no ghritasya dhara madhumat pavantam

मय्यग्रे॑ अ॒ग्निं गृ॑ह्णामि स॒ह क्ष॒त्रेण॒ वर्च॑सा॒ बले॑न ।
मयि॑ प्र॒जां मय्यायु॑र्दधामि॒ स्वाहा॒ मय्य॒ग्निम् ॥२॥

Mayyagre agnim grihnami saha kshatrena varchasa balena
Mayi prajam mayyayurdadhami svaha mayyagnim

इ॒हैवाग्ने॒ अधि॑ धारया र॒यिं मा त्वा॒ नि क्र॒न् पूर्व॑चित्ता निका॒रिणः॑ ।
क्ष॒त्रेणा॑ग्ने सु॒यम॑मस्तु॒ तुभ्य॑मुपस॒त्ता व॑र्धतां ते॒ अनि॑ष्टृतः ॥३॥

Ihaivagne adhi dharaya rayim ma tva ni kran purvachitta nikarinah
Kshatrenagne suyamamastu tubhyamupasatta vardhatam te anishtritah

अन्व॒ग्निरु॒षसा॒मग्र॑मख्य॒दन्वहा॑नि प्रथ॒मो जा॒तवे॑दाः ।
अनु॒ सूर्य॑ उ॒षसो॒ अनु॑ र॒श्मीननु॒ द्यावा॑पृथि॒वी आ वि॑वेश ॥४॥

Anvagnirushasamagramakhyadanvahani prathamo jatavedah
Anu surya ushaso anu rashminanu dyavaprithivi a vivesha

प्रत्य॒ग्निरु॒षसा॒मग्र॑मख्य॒त् प्रत्यहा॑नि प्रथ॒मो जा॒तवे॑दाः ।
प्रति॒ सूर्य॑स्य पुरु॒धा च॑ र॒श्मीन् प्रति॒ द्यावा॑पृथि॒वी आ त॑तान ॥५॥

Pratyagnirushasamagramakhyat pratyahani prathamo jatavedah
Prati suryasya purudha cha rashmin prati dyavaprithivi a tatana

घृ॒तं ते॑ अग्ने दि॒व्ये स॒धस्थे॑ घृ॒तेन॒ त्वां मनु॑र॒द्या समि॑न्धे ।
घृ॒तं ते॑ दे॒वीर्न॒प्त्य॑१आ व॑हन्तु घृ॒तं तुभ्यं॑ दुह्रतां॒ गावो॑ अग्ने ॥६॥

Ghritam te agne divye sadhasthe ghritena tvam manuradya samindhe
Ghritam te devirnaptya1a vahantu ghritam tubhyam duhratam gavo agne